viasna on patreon

Сітуацыя з правамі чалавека ў Беларусі. Ліпень 2020

2020 2020-08-03T13:40:41+0300 2020-08-03T17:31:30+0300 be https://spring96.org/files/images/sources/vokladka_lipen_2020.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Высновы:

  • на працягу месяца ў месцах пазбаўлення волі і следчых ізалятарах працягвалі знаходзіцца 24 палітвязні. У дачыненні да траіх абвінавачаных была змененая мера стрымання на падпіску аб нявыездзе, і яны былі вызваленыя з СІЗА;
  • на працягу месяца працягваліся затрыманні грамадзян у межах папярэдняга расследавання крымінальнай справы, узбуджанай па арт. 342 КК па падзеях 29 траўня ў г. Гродна (г.зв. “справе Ціханоўскага”), а таксама сяброў ініцыятыўнай групы Віктара Бабарыкі, які знаходзіцца ў СІЗА КДБ;
  • 14 ліпеня пасля прыняцця ЦВК рашэння аб адмове ў рэгістрацыі ў якасці кандыдатаў у Прэзідэнты В. Бабарыкі і В. Цапкалы ў г. Мінску і шэрагу іншых гарадоў прайшлі стыхійныя мірныя акцыі пратэсту. Нягледзячы на ​​выключна мірны характар ​​сходаў іх правядзенне было гвалтоўна спынена органамі міліцыі, удзельнікі затрымліваліся, пры гэтым міліцыяй ўжывалася відавочна непрапарцыйная фізічная сіла і спецсродкі (гумовыя дубінкі). У шэрагу выпадкаў падобныя дзеянні міліцыі справакавалі адказнае прымяненне фізічнай сілы грамадзянамі. Па гэтых падзеях СК былі распачатыя крымінальныя справы; на сёння вядома пра прынамсі 13 затрыманых;
  • усяго за ўдзел у мірных сходах 14 і 15 ліпеня па ўсёй тэрыторыі краіны супрацоўнікамі міліцыі было затрымана больш за 420 чалавек, з іх у Мінску больш за 330. Больш за 50 затрыманых былі пасля прыцягнутыя да адміністрацыйнай адказнасці ў выглядзе арышту, не менш за 70 аштрафаваныя. Не менш за 50 грамадзянаў былі затрыманыя 28 ліпеня ў будынку прыёмнай КДБ у г. Мінску, куды яны прыйшлі перадаць свае хадайніцтвы аб змене меры стрымання ў дачыненні да палітвязня В. Бабарыкі;
  • 30 ліпеня стала вядома аб узбуджэнні крымінальных спраў у дачыненні да Сяргея Ціханоўскага і Мікалая Статкевіча па арт. 13 ч. 2 арт. 293 КК (падрыхтоўка масавых беспарадкаў) і па ч.3 арт. 130 КК (распальванне нацыянальнай, расавай, рэлігійнай ці іншай сацыяльнай варожасці або розні), што, па версіі СК, звязана з затрыманнямі 29 ліпеня ў Мінскім раёне 33 супрацоўнікаў ЧВК Вагнера з пашпартамі грамадзян РФ. На думку праваабаронцаў ПЦ "Вясна", дадзеныя затрыманні могуць выкарыстоўвацца ўладамі для аказання ціску на кандыдата ў Прэзідэнты С. Ціханоўскую і нагнятання атмасферы страху напярэдадні выбараў і магчымых мірных акцый пратэсту ў пост-выбарчы перыяд;
  • на працягу месяца зафіксаваныя шматлікія выпадкі затрыманняў міліцыяй журналістаў незалежных СМІ пры ажыццяўленні імі сваіх непасрэдных журналісцкіх абавязкаў;
  • асаблівую занепакоенасць выклікаюць выпадкі негуманнага, жорсткага абыходжання ў дачыненні затрыманых міліцыяй удзельнікаў сходаў, а таксама палітвязняў, якія адбываюць працяглыя тэрміны адміністрацыйных арыштаў у ЦІП і ІЧУ, і асобаў, якiя ўтрымлiваюцца пад вартай у СІЗА;
  • у цэлым варта адзначыць, што прэзідэнцкая кампанія адбываецца на фоне бесперапынных рэпрэсій, у атмасферы нагнятання страху і запалохвання грамадства. У ліпені працягвалася значнае пагаршэнне сітуацыі з правамі чалавека ў краіне, якая набыла характар ​​крызісу.

Палітычныя зняволеныя і палітычна матываваны пераслед

На працягу месяца ў месцах у месцах пазбаўлення волі і следчых ізалятарах працягвалі знаходзіцца 24 палітвязні, у дачыненні да якія была абраная мера стрымання ў выглядзе ўтрымання пад вартай у рамках папярэдняга следства па раней узбуджаных крымінальных справах альбо ў сувязі з адбыццём пакарання ў выглядзе пазбаўлення волі ў адпаведнасці з прысудамі судоў, якія ўступілі ў законную сілу.

Беларуская і міжнародная праваабарончая супольнасць працягвае патрабаваць ад уладаў Беларусі іх неадкладнага вызвалення. 24 ліпеня ЕС запатрабаваў ад уладаў Беларусі вызваліць усіх адвольна затрыманых палітычных актывістаў.

1 ліпеня беларуская праваабарончая супольнасць выступіла з заявай аб прызнанні палітвязнем вядомага блогера Дзмітрыя Казлова (Шэры кот), які быў затрыманы 10 чэрвеня і адбываў 20 сутак адміністрацыйнага арышту ў ЦІП у г. Мінску. Па заканчэнні тэрміну арышту 30 чэрвеня на свабоду ён так і не выйшаў. Пазней стала вядома, што Д. Казлоў быў пераведзены ў СІЗА № 1 і 8 ліпеня яму было прад'яўлена абвінавачванне па ч. 1 арт. 342 КК (арганізацыя або ўдзел у групавых дзеянні, якія груба парушаюць грамадскі парадак) па падзеях 29 траўня ў г. Гродна (у межах гэтак званай “справы Ціханоўскага”).

2 ліпеня стала вядома пра затрыманне супрацоўнікамі ДФР КДК сябра ініцыятыўнай групы і асабістай памочніцы В. Бабарыкі Алены Карагачавай. Пазней стала вядома, што ёй былі прад'яўленыя абвінавачванні па ч. 2 арт. 243 КК (ухіленне ад выплаты падаткаў і збораў у асабліва буйным памеры) і абраная мера стрымання ў выглядзе ўтрымання пад вартай у СІЗА КДБ у г. Мінску.

Дзмітрый Карака, адзін з каардынатараў ініцыятыўнай групы па вылучэнні ў якасці кандыдата ў Прэзідэнты В. Бабарыкі, быў затрыманы 18 чэрвеня разам з Э. Бабарыкам па дарозе ў ТВК для здачы сабраных подпісаў. З моманту затрымання Д. Карака знаходзіцца ў СІЗА КДБ.

6 ліпеня беларуская праваабарончая супольнасць выступіла з заявай аб прызнанні А. Карагачавай і Д. Каракі палітвязнямі.

7 ліпеня ПЦ "Вясна" стала вядома, што вядомаму блогеру з г. Брэста Сяргею Пятрухіну, раней затрыманаму ў рамках г.зв. «справы Ціханоўскага» і абвінавачанаму па ч. 1 арт. 342 КК (арганізацыя або ўдзел у групавых дзеяннях, якія груба парушаюць грамадскі парадак) былі прад'яўленыя абвінавачванні яшчэ па двух артыкулах КК — арт. 369 (публічная абраза прадстаўніка ўлады ў сувязі з выкананнем ім службовых абавязкаў), а таксама па арт. 391 (абраза суддзі або народнага засядацеля ў сувязі з ажыццяўленнем iмi правасуддзя). Паводле папярэдняй інфармацыі, гэтыя абвінавачванні тычацца падзей двухгадовай даўніны.

9 ліпеня супрацоўнікамі міліцыі ў сваёй кватэры быў затрыманы актывіст і прэс-сакратар партыі «Народная Грамада» Сяргей Спарыш: ён таксама з'яўляецца фігурантам “справы Ціханоўскага”. 10 ліпеня ён быў прызнаны палітвязнем беларускімі праваабарончымі арганізацыямі. Таксама 10 ліпеня было прад'яўленае абвінавачванне па ч. 1 арт. 342 КК мадэратару сацсетак «Краіна для жыцця», грамадзяніну Расіі Дзмітрыю Папову. Ён стаў 19-м фігурантам «справы Ціханоўскага» і таксама быў прызнаны палітвязнем.

14 ліпеня ў сталіцы і шэрагу іншых гарадах краіны прайшлі стыхійныя мірныя пратэсты грамадзян у сувязі з рашэннем ЦВК аб адмове ў рэгістрацыі ў якасці кандыдатаў у Прэзідэнты В. Бабарыкі і В. Цапкалы. У Мінску супрацоўнікі АМАП ўжылі фізічную сілу і спецсродкі ў дачыненні да мірных дэманстрантаў, чым у шэрагу выпадкаў справакавалі грамадзян на прымяненне ў дачыненні да міліцыі фізічнай сілы ў адказ.

Па факце падзей у Мінску СК была ўзбуджаная крымінальная справа па ч. 1 арт. 342 КК (арганізацыя групавых дзеянняў, якія груба парушаюць грамадскі парадак або актыўны ўдзел у іх). У дачыненні да шэрагу затрыманых грамадзян таксама былі распачатыя крымінальныя справы па арт. 363 (супраціў супрацоўніку міліцыі) і арт. 364 (гвалт у дачыненні да супрацоўніка міліцыі) КК. Усяго вядома аб 13 затрыманых у рамках гэтых крымінальных спраў.

Па паведамленні СК і дзяржаўных СМІ, 29 ліпеня таксама былі затрыманыя 33 супрацоўнікі ЧВК Вагнера з пашпартамі грамадзян РФ, якія знаходзіліся на тэрыторыі санаторыя «Беларусачка» ў Мінскім раёне. Па словах прадстаўнікоў беларускіх дзяржаўных органаў, яны прыбылі ў Беларусь для дэстабілізацыі ўнутрыпалітычнай сітуацыі ў краіне. 30 ліпеня МЗС Расіі выступіў з афіцыйнай заявай, у якім выказаўся аб адыёзнай трактоўцы беларускім бокам затрыманняў расійскіх грамадзян, а таксама пра тое, што ўсе яны ляцелі транзітам праз Беларусь у Стамбул, маючы адпаведныя авіяквіткі.

30 ліпеня ўсе кандыдаты, якія бяруць удзел у выбарах, былі выкліканыя на пасяджэнне ў ЦВК, дзе дзяржсакратар Савета бяспекі А. Раўкоў папярэдзіў іх аб магчымых правакацыях і ўзмацненні бяспекі пры правядзенні імі агітацыйных масавых мерапрыемстваў.

Таксама 30 ліпеня з паведамлення СК стала вядома, што ў дачыненні да Сяргея Ціханоўскага, Мікалая Статкевіча і іншых асобаў распачатая крымінальная справа па арт. 13 ч. 2 арт. 293 КК (падрыхтоўка масавых беспарадкаў), акрамя таго ў дачыненні да С. Ціханоўскага распачатая крымінальная справа па ч. 3 арт. 130 КК па фактах “здзяйснення наўмысных дзеянняў, накіраваных на ўзбуджэнне іншай сацыяльнай варожасці, заклікаў да здзяйснення гвалтоўна-агрэсіўных дзеянняў у адносінах да супрацоўнікаў праваахоўных органаў”.

На думку экспертаў ПЦ "Вясна", затрыманні супрацоўнікаў прыватнай ваеннай кампаніі з пашпартамі грамадзян РФ у адсутнасць адпаведных афіцыйных зваротаў да расійскага ўрада маюць на мэце ўзмацненне ціску на кандыдатку ў Прэзідэнты Святлану Ціханоўскую, а таксама падтрыманне атмасферы страху ў грамадзтве напярэдадні выбараў з мэтай прадухілення магчымых мірных акцый пратэсту ў пост-выбарчы перыяд.

На працягу месяца ў сувязі са зменай меры стрымання на падпіску аб нявыездзе з СІЗА былі вызваленыя тры фігуранты «справы Ціханоўскага»: жыхары г. Гродна Васіль Баброўскі, Уладзімір Навумік і Вяргілій Ушак.

Свабода мірных сходаў і выказвання думкі

Уладамі Беларусі па-ранейшаму парушаецца свабода мірных сходаў і выказвання меркаванняў. Пад рэпрэсіі трапілі як удзельнікі перадвыбарных мерапрыемстваў, правілы якіх адвольна тлумачацца і фактычна змяняюцца ў бок непрапарцыйнага ўзмацнення жорсткасці, так і ўдзельнікі спантанных акцый мірнага пратэсту. Затрыманні часта суправаджаюцца парушэннем закона супрацоўнікамі міліцыі. Усяго за месяц ПЦ "Вясна" зафіксаваў больш за 550 інцыдэнтаў у дачыненні да грамадзян, звязаных з парушэннямі правоў чалавека, судамі больш за 80 раз прызначаны адміністрацыйны арышт, а таксама штрафы на суму каля 73 тысяч беларускіх рублёў.

У ліпені штотыдзень працягваўся «канвеерны» разгляд адміністрацыйных спраў у дачыненні да ўдзельнікаў перадвыбарчых пікетаў па зборы подпісаў за вылучэнне кандыдатаў у прэзідэнты і ўдзельнікаў «Ланцугоў салідарнасці» — пратэстных пікетаў, якія прайшлі ў многіх гарадах краіны.

3 ліпеня ў розных гарадах было затрымана, па інфармацыі ПЦ "Вясна", як мінімум 17 чалавек, часам з прымяненнем правакацый: сябар ініцыятыўнай групы Святланы Ціханоўскай Аляксандр Мілюк з г. Масты вяртаўся дадому з сынам, калі да яго падышоў мужчына і пачаў патрабаваць нейкія грошы, штурхаць і нецэнзурна лаяцца ў яго адрас; Мілюк вёў відэазапіс таго, што адбываецца, на тэлефон, але ў выніку ён быў затрыманы міліцыяй і ў дачыненні да яго адвольна складзены пратакол за дробнае хуліганства.

10 і 13 ліпеня прайшла новая хваля затрыманняў і судоў: падпісчыкі Telegram-каналаў, удзельнікі пратэстных акцый і велапрабегаў затрымліваліся і караліся буйнымі штрафамі і арыштамі за рэалізацыю сваіх правоў.

Увечары 14 ліпеня ў розных гарадах краіны людзі выйшлі на вуліцы сваіх гарадоў, каб выказаць пратэст супраць адмовы ў рэгістрацыі кандыдатамі на пасаду прэзідэнта альтэрнатыўных вылучэнцаў — Віктара Бабарыкі і Валерыя Цапкалы. Неапраўданая агрэсія і жорсткасць супрацоўнікаў міліцыі (амапаўцы і супрацоўнікі ў цывільным часта выкарыстоўвалі грубую фізічную сілу, збівалі людзей дубінкамі, нагамі і кулакамі) справакавалі супраціў пратэстоўцаў. Затрымана, па дадзеных МУС, больш за 250 чалавек, па дадзеных ПЦ "Вясна" — больш за 370 чалавек у розных гарадах.

З наступнага дня суды пачалі афармляць штрафы і арышты ўдзельнікаў.

На працягу дня 15 ліпеня да ўваходу ў будынак Цэнтральнай выбарчай камісіі стаяла чарга з людзей, якія прыйшлі падаць скаргу на нерэгістрацыю кандыдатам у прэзідэнты Віктара Бабарыкі. Паведамляецца, што ў чарзе знаходзілася больш за 2 000 чалавек, а сама яна расцягнулася не менш, чым на кіламетр. Да вечара на плошчу Незалежнасці пачалі сцягвацца супрацоўнікі АМАП і спецтэхніка. У горадзе з'явіліся салдаты ўнутраных войскаў, якія ачапілі вуліцу Мяснікова. У 19.00 ЦВК зачыніўся, людзі рушылі ў бок галоўнага паштамта, каб накіраваць скаргі поштай, але і ён тэрмінова спыніў працу. Былі перакрытыя станцыі метро "Кастрычніцкая", "Плошча Перамогі" і "Купалаўская". Людзі рушылі на чыгуначны вакзал, дзе кругласутачна працуе паштовае аддзяленне. Аднак і яно аказалася "замінаванае", у аддзяленні пагасілі святло. Адбыліся затрыманні: па дадзеных ПЦ "Вясна", затрыманыя 26 чалавек.

Паводле звестак праваабаронцаў "Вясны", на мірных акцыях, якія праходзілі 14 і 15 ліпеня, у Беларусі было затрымана як мінімум 420 чалавек.

17 ліпеня прадстаўніца Вярхоўнага камісара ААН па правах чалавека Ліз Тросэл нагадала уладам Беларусі пра абавязак садзейнічаць правядзенню мірных сходаў і падтрымліваць ажыццяўленне права на свабоду меркаванняў і іх свабоднае выказванне, у тым ліку тымі, хто выказвае нязгоду і падтрымлівае апазіцыйных кандыдатаў, а таксама пра тое, што журналісты, якія асвятляюць падзеі падчас пратэстаў, не павінны сутыкацца з перашкодамі ў выкананні сваёй працы і падвяргацца адвольным арыштам і змяшчэнню пад варту, улічваючы важную ролю, якую яны адыгрываюць у данясенні інфармацыі аб пытаннях, якія прадстаўляюць грамадскі інтарэс, і такім чынам у ажыццяўленні права на доступ да інфармацыі.

Яна заклікала вызваліць усіх тых, хто быў змешчаны пад варту за карыстанне сваімі правамі чалавека і ўсё яшчэ не вызвалены, а таксама правесці справядлівыя судовыя разгляды з захаваннем працэсуальных гарантый у рамках любых крымінальных і адміністрацыйных спраў, якія могуць быць распачатыя ў дачыненні да іх. Ад імя Вярхоўнага камісара ААН яна таксама нагадала уладам, што неналежнае абмежаванне правоў на свабоду меркаванняў і іх свабоднае выказванне, мірных сходаў і асацыяцыі можа падарваць легітымнасьць будучага выбарчага працэсу.

27 ліпеня сваякі палітвязня Дзмітрыя Фурманава — маці Вольга Фурманава і яго дзяўчына Вольга Каракіна — абвясцілі бестэрміновую галадоўку каля будынка СІЗА № 1 на вуліцы Валадарскага ў Мінску. Яны патрабуюць вызваліць Дзмітрыя Фурманава, які быў затрыманы 29 траўня на пікеце ў Гродне разам з Сяргеем Ціханоўскім і іншымі. Акрамя гэтага, яны патрабуюць вызвалення людзей, якія незаконна ўтрымліваюцца ў Цэнтры ізаляцыі правапарушальнікаў (1-ы завулак Акрэсціна, 36 у Мінску), а таксама спынення крымінальных спраў па артыкуле 342 Крымінальнага кодэкса Рэспублікі Беларусь.

У ліпені масава пераследваліся падпісчыкі Telegram-канала «Армія з народам»: у ПЦ "Вясна" звярнуліся ўжо каля дзясятка падпісчыкаў гэтага Telegram-канала, якія адзначаюць брутальнасць і непрапарцыйна дзеянняў супрацоўнікаў упраўлення па барацьбе з арганізаванай злачыннасцю.

У Мінску 28 ліпеня каля КДБ і ў самім будынку было затрымана больш за 50 чалавек. Сярод іх людзі, якія прыйшлі падаць хадайніцтва аб змене мер стрымання для палітвязняў Віктара і Эдуарда Бабарыкаў, а таксама журналісты, якія прыйшлі асвяціць падзею. Затрыманне ажыццяўлялі супрацоўнікі АМАПу, затрыманых развезлі па некалькіх аддзелах міліцыі. Большасць з затрыманых пасля вызвалілі без складання пратаколаў. Аднак праваабаронцам "Вясны" вядома аб мінімум 11 выпадках судовых працэсаў у дачыненні да затрыманых і ўжыванні да іх адміністрацыйных арыштаў ад 14 да 15 сутак па арт. 23.34 КаАП.

Спробы правесці мірныя сходы па правілах, прадугледжаных законам для масавых мерапрыемстваў, адвольна спыняюцца ўладамі. Так, мінскі гарвыканкам забараніў Аб'яднанай грамадзянскай партыі праводзіць масавае мерапрыемства ў прадугледжаным для гэтага месцы — сустрэчу грамадзян з нагоды рэферэндуму, якую ініцыяваў штаб Віктара Бабарыкі. Прычынай стала адмова камунальнага прадпрыемства «Зелянбуд» і ГУУС Мінгарвыканкама падпісаць папярэдне дамовы, якія з'яўляюцца умовай правядзення мерапрыемства ў паведамляльным парадку.

Апублікаваны даклад «Маніторынг права на свабоду сходаў у Беларусі у 2019 годзе», сумесна падрыхтаваны Еўрапейскім цэнтрам некамерцыйнага права ECNL, Праваабарончым цэнтрам "Вясна", РПГА “Беларускі Хельсінкскі камітэт” і праваабарончай арганізацыяй Human Constanta.

У дакладзе прыведзены аналіз прававога рэгулявання мірных сходаў у Беларусі; сабрана і прааналізавана колькасная і якасная статыстыка мірных сходаў, якія прайшлі ў Беларусі у 2019 годзе; прыведзены вынікі вочнага маніторынгу 21 мірнага сходу. Таксама закрануты пытанні рэалізацыі права на свабоду сходаў дзецьмі, адміністрацыйнага пераследу і асаблівасці правядзення мірных сходаў падчас выбарчых кампаній. Паводле аўтараў, даклад разлічаны на шырокую зацікаўленую аўдыторыю, у тым ліку прадстаўнікоў дзяржаўных органаў, адказных за забеспячэнне дадзенага права.

Пераслед журналістаў

Міністэрства ўнутраных спраў Беларусі пакінула без разгляду сумесную заяву Беларускай асацыяцыі журналістаў і рэдакцый больш чым 50 медыя з патрабаваннем спыніць пераслед журналістаў.

Паводле інфармацыі прэс-службы ГА «Беларуская асацыяцыя журналістаў», у сваім адказе МУС спасылаецца на тое, што разам з заявай ГА «Беларуская асацыяцыя журналістаў» і рэдакцыі медыя не прыклалі дакументы, якія пацвярджаюць права прадстаўляць інтарэсы калег. Варта заўважыць, што абарона правоў і законных інтарэсаў сваіх сябраў у дзяржаўных органах з'яўляецца статутнай мэтай ГА «БАЖ», і, у адпаведнасці з законам, кожны можа паведамляць у дзяржаўныя органы аб выяўленых парушэннях і ўносіць прапановы — рэкамендацыі па паляпшэнні дзейнасці арганізацый, удасканаленні прававога рэгулявання адносін у дзяржаўным і грамадскім жыцці, вырашэнні пытанняў эканамічнай, палітычнай, сацыяльнай і іншых сфераў дзейнасці дзяржавы і грамадства.

Затрыманнямі журналістаў суправаджаецца практычна кожны выпадак масавых затрыманняў у Мінску.

Жорсткае абыходжанне

На пачатку ліпеня апублікаваны вынік першага вымярэння Індэкса забароны катаванняў у краінах АБСЕ, які быў ініцыяваны Працоўнай групай па барацьбе з катаваннямі Платформы “Грамадзянская салідарнасць” — аб'яднання амаль 100 праваабарончых арганізацый рэгіёна АБСЕ, якое рэалізуе ініцыятывы, накіраваныя на больш поўнае захаванне забароны катаванняў у дадзеных краінах. Зводны паказчык Індэкса змяшчае ацэнкі дзяржаўнага механізму рэагавання на катаванні, судовага кантролю, наяўнасці нормаў у нацыянальным заканадаўстве, якія забараняюць катаванні, узроўню забеспячэння працэсуальных гарантый, якія працуюць на прэвенцыю катаванняў, працуючых у краіне механізмаў і сродкаў прэвенцыі катаванняў і ступені прыняцця дзяржавай міжнародных абавязацельстваў у галіне забароны катаванняў.

Згодна з праведзеным даследаваннем, Беларусь заняла апошняе месца ў рэйтынгу постсавецкіх краін-удзельніц АБСЕ.

Затрыманыя ўдзельнікі мірных сходаў, тым часам, падвяргаюцца жорсткаму абыходжанню.

Аб жорсткасці міліцыі і пагрозах заявіла Алена Колікава з Салігорску: за апошні месяц яна была затрыманая двойчы, і кожны раз у яе затрыманні прымалі ўдзел супрацоўнікі Галоўнага ўпраўлення па барацьбе з арганізаванай злачыннасцю. Пасля апошняга затрымання і трох дзён у ізалятары яна выйшла на волю ў статусе падазраванай па крымінальнай справе па cт. 342 КК РБ (Арганізацыя альбо актыўны ўдзел у дзеяннях, якія груба парушаюць грамадзкі парадак) — той самай, па якой зараз праходзіць Сяргей Ціханоўскі і яшчэ як мінімум 20 чалавек.

У ЦІП і ІЧУ ГУУС Мінгарвыканкама працягваюць утрымлівацца людзі, якім быў прызначаны адміністрацыйны арышт, часам па працягласці супастаўны з пакараннем у выглядзе арышту з Крымінальнага кодэкса. Так, напрыклад, Вольга Нікалайчык змяшчалася ў ЦІП на працягу месяца, 22 дні з іх — у карцары; Павел Севярынец утрымліваецца там з 7 чэрвеня. Доўгі час зняволеныя не атрымлівалі перадач з неабходнымі рэчамі і прадметамі гігіены.

Арыштаваныя і затрыманыя ўтрымліваюцца ў мінскіх ізалятарах ва ўмовах, якія не адпавядаюць патрабаванням закона; у сувязі з гэтым у ГУУС паступілі шматлікія скаргі актывістаў і праваабаронцаў. Кіраўніцтва ГУУС не распачало эфектыўных мер па паляпшэнню сітуацыі з санітарным станам гэтых месцаў зняволення і з аднаўленнем іншых правоў арыштаваных, у тым ліку права на абарону і звароты. Кантралюючыя органы ўхіляюцца ад адказу па запытах аб санітарным стане ў ізалятарах.

15 ліпеня падчас выканання сваіх прафесійных абавязкаў былі затрыманыя журналіст Радыё Свабода Антон Трафімовіч і пазаштатная супрацоўніца БелаПАН Віялета Саўчыц. Антон Трафімовіч вёў прамое ўключэнне каля будынку Цэнтрвыбаркама, куды прыйшлі сотні мінчан. Пазней 6-7 чалавек, двое ў форме АМАПу, астатнія — у цывільным, закруцілі яму рукі за спіной, засунулі ў рот кулак, пры затрыманні моцна ўдарылі па носе. У мікрааўтобусе яго паставілі на падлогу на калені, надзелі кайданкі за спіной, увесь час трымалі галавой ўніз. У журналіста цякла кроў, але супрацоўнікі міліцыі на гэта не рэагавалі. У дзень, калі А. Трафімовіч накіроўваўся на агляд да экспертаў, ён па дарозе быў затрыманы міліцыяй; супрацоўнікі недвухсэнсоўна далі зразумець, што яму варта адмовіцца ад ідэі пераследваць іх калегаў за перавышэнне ўлады.

Палітвязень Сяргей Ціханоўскі падвяргаецца ціску ў СІЗА: па надуманых прычынах 10 ліпеня ён у чарговы раз змешчаны ў карцар. Таксама стала вядома аб тым, што ў следчым ізалятары арганізаваная правакацыя ў дачыненні да С. Ціханоўскага: распаўсюджаныя чуткі аб магчымасці аднясення яго да зняволеных з нізкім статусам, што сур'ёзна пагражае яму жорсткім і прыніжальным абыходжаннем. Такое становішча варта расцэньваць як катаванні — дзеянне, якім нейкай асобе наўмысна наносіцца пакута, фізічная альбо маральная, каб атрымаць ад яго звесткі або прызнанне, пакараць за дзеянне, якое гэтая асоба здзейсніла або ў здзяйсненні якога падазраецца, а таксама запалохаць ці прымусіць яе ці трэцюю асобу, калі пакуты прычыняюцца дзяржаўнай службовай асобай ці іншай асобай, якая выступае ў афіцыйнай якасці, альбо па іх падбухторванні ці з іх ведама або маўклівай згоды.

Апошнія навіны

Партнёрства

Сяброўства