Працягваюцца затрыманні ў межах "крыміналак" за падзеі 14 ліпеня ў Мінску. Ужо мінімум 13 фігурантаў Дапоўнена
Па стане на 29 ліпеня праваабаронцам "Вясны" вядома, што ў межах крымінальных справаў за падзеі 14 ліпеня ў Мінску затрыманыя мінімум трынаццаць чалавек. Крымінальныя справы распачатыя па трох артыкулах Крымінальнага кодэкса: 363 (супраціўленне супрацоўніку органаў унутраных спраў), 364 (гвалт у дачыненні да супрацоўніка органаў унутраных спраў), 342 (арганізацыя і ўдзел у парушэнні грамадскага парадку, спалучаных з відавочным непадпарадкаваннем законным патрабаванням супрацоўнікаў органаў унутраных спраў).
- Мінск, 14 ліпеня. Фота: spring96.org
27 ліпеня ў межах крымінальнай справы па арт. 364 (гвалт у дачыненні да супрацоўніка органаў унутраных спраў) і ч. 1 арт. 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) затрыманы Ілля Туркоў. Ён змешчаны ў Ізалятар часовага ўтрымання на Акрэсціна ў Мінску.
Таксама затрыманы Яўген К. Па папярэдняй інфармацыі яму інкрымінуюць, як і Туркову, два артыкулы Крымінальнага кодэкса: арт. 364 і ч. 1 арт. 342.
Раніцай 29 ліпеня за падзеі 14 ліпеня ў Мінску быў затрыманы Ілля Фрэнь. Яго забралі ў Следчы камітэт на падставе ч. 1 арт. 342 Крымінальнага кодэкса.
Раней з 10-сутачнага арышту не выйшаў Спартак Сірэнка, які быў асуджаны за "ўдзел у несанкцыянаваным масавым мерапрыемстве" і "непадпарадкаванні законным патрабаванням міліцыі". Вядома, што яго пакінулі пад вартай у якасці падазраванага па арт. 342 Крымінальнага кодэксу – "Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх". У панядзелак, 27 ліпеня, яго выпусцілі на волю, але ён застаецца ў статусе падазраванага па ч. 1 арт. 342 КК.
Таксама пасля 12-сутачнага арышту з ЦІП не выйшаў на волю Глеб Гатоўка. 26 ліпеня, у нядзелю, у яго дома адбыўся ператрус. Ён падазраецца ў здзяйсненні двух артыкулаў Крымінальнага кодэкса: ч. 1 арт. 342 і 364.
Дапоўнена. Як паведаміла "Вясне" сястра Антона Шумава Святлана, 24 ліпеня яму прад'явлі абвінавачванне па ч. 1 арт. 342 і 364 Крымінальнага кодэкса. Абрана мера стрымання – утрыманне пад вартай. Ён знаходзіцца ў Следчым ізалятары №1 у Мінску на вул. Валадарскага, 2.
Такім чынам, спіс фігурантаў крымінальных справаў за падзеі 14 ліпеня ў Мінску выглядае так:
Праваабаронцам "Вясны" вядома, што па дадзеных крымінальных справах затрыманыя яшчэ мінімум чатыры чалавекі. * Абвінавачванні пакуль не прад'яўленыя, таму інфармацыя аб інкрымінаваных артыкулах – папярэдняя. |
Нагадаем, вечарам 14 ліпеня ў Мінску і іншых гарадах краіны прайшлі стыхійныя акцыі пратэсту супраць нерэгістрацыі кандыдатамі ў прэзідэнты Віктара Бабарыкі і Валерыя Цапкалы. У сталіцы ў той вечар было затрымана каля 300 чалавек, многія з іх былі аштрафаваныя і адпраўленыя на "суткі".
Пазней па гэтых падзеях былі распачатыя крымінальныя справы па трох артыкулах Крымінальнага кодэкса: 363 (супраціў супрацоўніку органаў унутраных спраў), 364 (Гвалт альбо пагроза ўжывання гвалту ў дачыненні да супрацоўніка органаў унутраных спраў), 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
Крымінальныя справы за падзеі 14 ліпеня ў Мінску. Што вядома?
