Магілёўца, які выйшаў з БЧБ-сцягам 3 ліпеня, падманам завабілі ў міліцыю і потым таемна асудзілі

Праваабаронцам «Магілёўскай вясны» стала вядома, што Глеба Будкова, на якога заведзена адміністрацыйная справа за «несанкцыянаванае масавае мерапрыемства», таемна асудзілі на 5 сутак 8 ліпеня.

Пра гэта Будкоў паведаміў праваабаронцу Барысу Бухелю. Па словах хлопца, днём 8 ліпеня яму патэлефанавалі з Ленінскага РАУС і запрасілі азнаёміцца ​​з матэрыяламі адміністрацыйнай справы.

"Яго падманулі. Ён падаў заяву ў суд аб азнаямленні з матэрыяламі справы. Гэтую заяву паклалі ў справу і сказалі прыйсці праз 3 дні. Аднак потым справу адправілі ў РАУС для ліквідацыі недахопаў. Пазаўчора патэлефанавалі ўжо супрацоўнікі міліцыі і запрасілі ў райаддзел для азнаямлення са справай. Будкоў прыйшоў, здаў тэлефон і іншыя асабістыя рэчы ў камеру захоўвання, пасля чаго яго тут жа фактычна затрымалі для складання новага адміністрацыйнага пратаколу, пасля чаго адразу даставілі ў суд", – распавёў Бухель.

На самім судзе Будкову не далі час на пошук адваката, а таксама адмовіліся інфармаваць яго блізкіх пра тое, што ён знаходзіцца на працэсе. Асабіста патэлефанаваць хлопец таксама нікому не мог – яго тэлефон і асабістыя рэчы пакінулі ў камеры захоўвання ў Ленінскім РАУС.

Суд прайшоў хутка – суддзя Вікторыя Палякова не задаволіла ніводнага хадайніцтва і прызначыўшы Будкову арышт у 5 сутак. У іх ужо залічылася 2,5 сутак з тых, што Глеб правёў на ІЧУ пасля затрымання 3 ліпеня. Яшчэ двое з паловай сутак яму прыйдзецца «адседзець» папазней – пакуль Будкова адпусцілі дадому.

Менавіта таму праваабаронцам удалося даведацца, што над хлопцам прайшоў таемны суд. Нягледзячы на ​​тое, што працэс быў адкрытым, з-за дзеянняў суддзі і міліцыі на яго не ўдалося трапіць ні сябрам, ні сваякам Глеба, ні журналістам, ні праваабаронцам.

У сваёй пастанове суддзя Палякова пазначыла, што Будкоў прызнаў віну толькі часткова. Глеб заявіў на судзе, што ніякіх пікетаў ён не праводзіў, нікога ні да чаго не заклікаў, таму ні ў які гарвыканкам з паведамленнем аб масавым мерапрыемстве не звяртаўся.

Асновай для абвінавачвання Будкова стаў рапарт намесніка начальніка аддзела аховы правапарадку і прафілактыкі Ленінскага РАУС Паўла Башарымава. Ён у апошні час фактычна займаецца палітычным пераследам магілёўскіх актывістаў, праваабаронцаў і журналістаў.

Згодна з Башарымавым, «Будкоў 3 ліпеня правёў несанкцыянаваны пікет паблізу дома №57 па вул. Першамайскай (ГЦ «Атрыум»), выкарыстаўшы сцяг бел-чырвона-белага колеру з мэтай выказвання салідарнасці роўнасці цемнаскурых людзей у Рэспубліцы Беларусь, дэманструючы яго навакольным, не маючы на ​​тое адпаведнага дазволу».

Упершыню Глеба Будкова затрымалі каля 16 гадзін дня 3 ліпеня каля ГЦ «Атрыум». Яго сябар паведаміў праваабаронцам «Магілёўскай вясны», што падставай для затрымання стаў бел-чырвона-белы сцяг, які малады чалавек навязаў на сваіх плячах. Трое сутак Будкова пратрымалі ў ізалятары часовага ўтрымання.

Першы судовы працэс прызначылі на 12 дня 6 ліпеня. Глеба абвінавацілі ў парушэнні Закона “Аб масавых мерапрыемствах”, склаўшы на яго пратакол за арганізацыю незаконнага пікету ў цэнтры горада. Аднак высветлілася, што міліцыя здзейсніла шэраг памылак у пратаколе і адміністрацыйную справу адправілі на дапрацоўку.