Праваабарончы цэнтр «ВЯСНА»

Навіны за 9 сакавіка 2012

09.03.2012 Беларускі ўрад аспрэчвае скаргі сваіх грамадзян у ААН

Кіраўніцтва краіне не пагаджаецца з тым, што Камітэт ААН па правах чалавека зарэгістраваў 56 скаргаў беларусаў.

09.03.2012 Вілейскі дэпутат збіраецца пратэставаць

Дэпутат Вілейскага раённага Савета дэпутатаў Іосіф Маціюн падаў заяву на правядзенне пікету, мэтай якога акрэсліў выказванне пратэсту супраць парушэння ягоных канстытуцыйных правоў. Заяўнік лічыць, што ён падвяргаецца пераследу за адстойванне асабістага меркавання. У прыватнасці, з-за гэтага з ім не працягнулі працоўны кантракт.

09.03.2012 Анатоля Аскерку будуць судзіць за акцыю ў падтрымку Саннікава

На Анатоля Аскерку склалі пратакол аб адміністратыўным правапарушэнні за ўдзел у акцыі, прымеркаванай да дня нараджэння палітвязня Андрэя Саннікава. Актывіст знаходзіцца ў Ізалятары часовага ўтрымання Барысаўскага РАУС. У ІЧУ паведамілі, што суд над Анатолем Аскеркам адбудзецца заўтра, 10 сакавіка.

09.03.2012 Альтэрнатыўных крыніц інфармацыі паболела

Напрыканцы лютага ў шэрагу раёнаў Магілёўскай вобласці аднавілі свой выхад цэлы шэраг недзяржаўных маланакладных газет і інфармацыйных бюлютэняў. Распаўсюднікі газет у рэгіёнах адзначаюць, што цікаўнасць да альтэрнатыўных крыніц інфармармацыі вельмі высокая.

09.03.2012 У Барысаве затрымалі актывістаў Анатоля Аскерку і Івана Шутко

Каля 11-й гадзіны да актывіста Партыі БНФ з Барысава Анатоля Аскеркі дадому прыехалі міліцыянты і забралі яго ў раённы аддзел міліцыі. Прыкладна ў той самы час быў затрыманы моладзевы актывіст Іван Шутко.

09.03.2012 Пінскія ўлады забаранілі літаратурную вечарыну

У вёсцы Місяцічы Пінскага раёну планавалася правядзенне творчай імпрэзы з нагоды стогадовага юбілею ўкраінскага пісьменніка Фёдара Одрача, які нарадзіўся ў гэтых мясцінах. У якасці прычыны для забароны мерапрыемства чыноўнікі спаслаліся на тое, што Фёдар Одрач быў удзельнікам Украінскай паўстанцкай арміі і змагаўся з Чырвонай Арміяй.

09.03.2012 У Гародні пададзеная заяўка на правядзенне Дня Волі

Гарадзенскія прадстаўнікі трох дэмакратычных партый – АГП, БНФ і БСДГ падалі заяўку ў гарвыканкам на правядзенне 25 сакавіка ў горадзе мітынгу. Афіцыйны ліст падпісалі Юры Істомін, Вадзім Саранчукоў і Уладзімір Хільмановіч.

09.03.2012 Моладзевы фотаконкурс на тэму правоў чалавека

Вы захопленыя фатаграфіяй? У вас асаблівы погляд на свет? Адрозніваецеся актыўнай жыццёвай пазіцыяй і шукаеце спосаб данесці да грамадства свае ідэі? Уважліва чытайце гэтую аб'яву! Абвяшчаецца конкурс фатаграфій і малюнкаў на тэму "Правы чалавека ў сучасным свеце ".

09.03.2012 Міжнародная акцыя “Вольная Беларусь” пройдзе 18 сакавіка

На 18 сакавіка прызначана правядзенне агульнаеўрапейскай акцыі "Вольная Беларусь", якую ўжо сёмы год запар ладзяць Маладыя Еўрапейскія Федэралісты (JEF). Арганізатары акцыі запрашаюць усіх ахвочых прыцягнуць увагу да падзеяў у Беларусі, а таксама дадаць свой унёсак да адзінай і вольнай Еўропы.

09.03.2012 Гарадзенскія праваабаронцы павіншавалі Андрэя Саннікава

8 сакавіка гарадзенскія праваабаронцы павіншавалі палітычнага зняволенага Андрэя Саннікава з Днём народзінаў. Раман Юргель з БХК, які дасылаў Саннікаву тэлеграму, адзначыў: “Гэта справа маральнай падтрымкі, мяркую, што грамадства не павінна быць абыякавым да лёсу палітвязняў і выяўляць сваю салідарнасць”.

09.03.2012 У Бярозе адзначылі Дзень народзінаў Андрэя Саннікава (фота)

У Дзень нараджэння палітвязня, кандыдата ў прэзідэнты Андрэя Саннікава, у Бярозе з’явіліся плакаты з ягонай выявай на цэнтральнай вуліцы. Мясцовыя актывісты адзначаюць, што гэта маленькі унёсак у вялікую падзяку мужнаму чалавеку, падтрымка ягонай сям’і.

09.03.2012 Міліцыя перашкодзіла гомельскім актывістам павіншаваць мінакоў з 8 сакавіка (відэа)

8 сакавіка ля цэнтральнага ўнівермагу Гомеля актывісты руху «Наша альтэрнатыва» праводзілі акцыю ў рамках кампаніі «Хопіць піць - трэба жыць!». Кастусь Жукоўскі, Зміцер Карашкоў, Васіль Такарэнка і Андрусь Цянюта віншавалі мінакоў з Міжнародным жаночым днём і раздавалі святочныя паштоўкі антыалкагольнай тэматыкі.

09.03.2012 Права на атрыманне інфармацыі зноў абскарджваецца ў судзе

Брэсцкі актывіст Сяргей Вакуленка спрабуе праз суд дамагчыся выканання заканадаўства пра звароты грамадзян ад мясцовых уладаў. Ён звярнуўся у суд Ленінскага раёну Брэста, аднак там не знайшлі ніякіх парушэнняў у дзеяннях гарадскіх уладаў. Зараз мясцовы актывіст звярнуўся ў Брэсцкі абласны суд.

09.03.2012 Гарадзенскія апазіцыянеры плануюць Дзень Волі адзначыць мітынгам

Прадстаўнікі трох гарадзенскіх дэмакратычных партый вырашылі падаць супольную заяўку ў Гарадзенскі гарвыканкам на правядзення мітынгу, прысвечанаму чарговым угодкам абвяшчэння Беларускай Народнай Рэспублікі.

09.03.2012 Паўторны суд над Аляксандрам Крутым адбудзецца 19 сакавіка

Паўторны разгляд па справе жыхара Менска Аляксандра Крутога, якога прысудзілі да прымусовага лячэньня, прызнаўшы недзеяздольным, адбудзецца 19 сакавіка ў судзе Маскоўскага раёна Менска. Суддзёй прызначаны Яўген Хаткевіч.