Праваабарончы цэнтр «ВЯСНА»

Навіны за Сьнежань 2010

28.12.2010 Арышт Мікіту Ліхавіду адменены, ён будзе праходзіць па крымінальнай справе

Адносна актывіста Руху "За свабоду" Мікіты Ліхавіда, асуджанага на 15 сутак арышту за ўдзел у акцыі пратэсту 19 снежня, адменена адміністратыўнае пакаранне і ён з'яўляецца падазраваным па крымінальнай справе аб масавых беспарадках. Сёння або заўтра Мікіта Ліхавід будзе дастаўлены з ізалятара часовага ўтрымання Жодзіна ў ізалятар КДБ у Мінску.

28.12.2010 У КДБ апытаны гарадзенскі праваабаронца Уладзімір Хільмановіч

Гарадзенскі журналіст і праваабаронца Уладзімір Хільмановіч быў апытаны ў мясцовым упраўленні КДБ на прадмет яго прысутнасці на плошчы ў Мінску 19 снежня.

28.12.2010 Італьянскія праваабаронцы заклікалі Еўрасаюз рашуча асудзіць дзеянні беларускіх уладаў

Італьянская грамадская ініцыятыва “Свабода, законнасць і правы ў Еўропе” (Freedom Legality and Rights in Europe) на чале з Прэзідэнтам Мікеле Курто звярнулася да Прэзідэнта Еўрапейскага Парламента Ежы Бузэка і Еўрапейскага камісара па замежных справах Кэтрын Эштан. FLARE выказвае глыбокую заклапочанасць наконт сітуацыі ў Беларусі пасля выбараў. “Мы просім Вас рашуча асудзіць гэта на ўсіх узроўнях і ўсімі інструментамі, якія ёсць у вашым распараджэнні”, - гаворыцца ў звароце.

28.12.2010 Літоўскі Сейм патрабуе аднаўлення санкцый у дачыненні да Беларусі

23 снежня Сейм Літоўскай Рэспублікі прыняў Рэзалюцыю Аб выбарах Прэзідэнта Рэспублікі Беларусь , што адбыліся 19 снежня 2010 года. Рэзалюцыя ўтрымлівае прапанову да Прэзідэнта і Урада Літоўскай Рэспублікі, Камітэта Сейма па замежных справах разгледзець мэтазгоднасць пытання аб аднаўленні санкцый у дачыненні да Беларусі.

28.12.2010 Слухайце штотыднёвую праваабарончую праграму “Людзьмі звацца!” на хвалях Радыё Рацыі

Кожны аўторак у эфіры незалежнай радыёстанцыі “Радыё Рацыя” - праграма “Людзьмі звацца!”, якая асвятляе падзеі, датычныя правоў чалавека на Беларусі. Час выхаду ў эфір – 15-05 (паўтор - серада 0:05-1:00 і субота 7:05-8:05). Таксама ў гэты час яе можна слухаць праз інтэрнэт на сайце www.racyja.com. Выпуск праграмы “Людзьмі звацца!” ад 28 снежня цалкам прысвечаны паслявыбарчым падзеям у Беларусі.

28.12.2010 Давераных асабаў кандыдата Саннікава выклікаюць у КДБ

Сёння па тэлефоне на размову ў Камітэт дзяржбяспекі былі запрошаныя Касьян Марыя і Старыкаў Арцём, давераныя асобы былога кандыдата ў прэзідэнты Беларусі Андрэя Саннікава

28.12.2010 Сярод асуджаных за ўдзел у акцыі пратэсту – прафесар Георгій Лепін

Відаць, толькі ўзрост выратаваў прафесара ад арышту – “гуманны” суддзя Палулех К.І. з суда Савецкага раёна сталіцы пастанавіў яго "толькі аштрафаваць" на 30 базавых велічынь. Так, прафесар, якому ў лютым будзе 80 гадоў, за свае меркаванні і перакананні заплаціць нашай “стабільнай і квітнеючай” дзяржаве больш за мільён.

28.12.2010 У Гродна выклікаюць у КДБ Аляксандру Васілевіч і Уладзіміра Хільмановіча

Моладзевай актывістцы АГП з Гродна Аляксандры Васілевіч сёння патэлефанавалі і запрасілі на размову ў мясцовае УКДБ адносна падзей 19 снежня ў Менску. Пра гэта паведаміў праваабаронца Уладзімір Хільмановіч, які атрымаў аналагічнае запрашэнне.

28.12.2010 Адказ ЦВК праваабаронцу – прадказальны

Баранавіцкі праваабаронца Сяргей Гоўша атрымаў з Цэнтрвыбаркаму адказ на сваю скаргу за подпісам старшыні камісіі Лідзіі Ярмошынай. “Фактаў парушэння выбарчага заканадаўства пры правядзенні датэрміновага галасавання на выбарчым участку № 28 г.Баранавічы не выяўлена”, - рэзюмуецца ў лісце на адрас праваабаронцы.

28.12.2010 На кватэры Лябедзькі пачаўся ператрус

Пра ператрус "Свабодзе" паведаміла намесьніца старшыні выканкаму Аб'яднанай грамадзянскай партыі Аксана Крышчановіч.

28.12.2010 Вызвалены Дзяніс Лазар

Дзяніс Лазар, які праходзіў у якасці падазраванага па крымінальнай справе аб "хуліганстве", вызвалены з ізалятара КДБ. Справа ў адносінах да актывіста "Маладога фронту" цалам спыненая.

28.12.2010 У Аляксандра Лукашэвіча шукалі сьляды падрыўной дзейнасьці

Супрацоўнікі КДБ ўвечары 27 сьнежня прыйшлі з ператрусам у кватэру бацькоў Аляксандра Лукашэвіча, даверанай асобы кандыдата ў прэзідэнты Алеся Міхалевіча.

28.12.2010 Рада БНР прапанавала “жалезную заслону” для КДБ і АМАПу

Рада БНР зьвярнулася да ўраду шэрагу краінаў з прапановай увесьці забарону на ўезд для супрацоўнікаў сілавых і праваахоўных структураў Беларусі і членаў іх сем’яў.

28.12.2010 27 снежня адбыўся другі допыт Віталя Рымашэўскага

У панядзелак, 27 снежня, з былым кандыдатам у прэзідэнты Віталем Рымашэўскім другі раз змог сустрэцца яго адвакат. Стан здароўя Віталя здавальняючы, нягледзячы на пэўныя праблемы.