"Убачымся на новым судзе! Вы за ўсё адкажаце!" За падрыхтоўку да масавых беспарадкаў, якіх не было, палітвязняў асудзілі на 5 гадоў калоніі кожнага

У судзе Маскоўскага раёна г. Мінска 10 чэрвеня агучылі прысуд ў дачыненні да валанцёраў штаба Бабарыкі, палітзняволеных Ігара Ярмолава, Дзмітрыя Канапелькі, Уладзіслава Карэцкага і Мікалая Сасева, якіх вінавацілі ў падрыхтоўцы да масавых беспарадкаў (ч. 1 арт. 13 і ч. 2 арт. 293 КК) і іншай падрыхтоўцы асобаў да ўдзелу ў масавых беспарадках (ч. 3 арт. 293 КК).

Падчас спрэчак бакоў пракурор Раман Бізюк запрасіў для ўсіх абвінавачаных па 5 гадоў пазбаўлення волі ва ўмовах узмоцненнага рэжыму, а таксама канфіскаваць аўтамабіль маці Ігара Ярмолава.

Сёння суддзя Святлана Бандарэнка вынесла прысуд: пакараць Ігара Ярмолава, Дзмітрыя Канапельку, Уладзіслава Карэцкага і Мікалая Сасева па ч. 1 арт. 13 ч. 2 арт. 293 КК пазбаўленнем волі тэрмінам на 5 гадоў, а па ч. 3 арт. 293 КК - на 3 гады. Канчаткова прызначыць пакаранне кожнаму абвінавачанаму ў выглядзе пазбаўлення волі тэрмінам на 5 год ва ўмовах узмоцненнага рэжыму. Аўтамабіль KIA Рыа і лазерныя ўказкі канфіскаваць у даход дзяржавы.

Пасля прысуду Ігар Ярмолаў крыкнуў: "Убачымся на новым судзе! Вы за ўсё адкажаце!" і зачытаў урывак вершу Уладзіміра Караткевіча "Паўлюк Багрым": 

О, як хочацца волі!
Жаданая воля, ты чуеш?
Асвяці мне усмешкай
Апошнія дні у жыцці.
Ты маўчыш?
Ты не чуеш?
Можа, ў дзень, калі ты запануеш,
Верас будзе стагоддзі
З разбітага сэрца расці.

Беларусь, прачынайся!
Я цябе абуджаю!
Ты павінна прачнуцца,
Не праспі сваё шчасце ўначы,
Я гукаю цябе,
Дарагая, святая!
Адкажы ж, мая родная,
Не маўчы!..
Паміраю і веру:
Калісьці над светлымі водамі,
Над свабоднай зямлёю
І над Белаю Руссю маёй
Шчасце сонцам заззяе,
І слова нашчадка свабоднага
Мае раны загоіць
Гаючай жывою вадой.

Прысутныя, якіх настойліва канваіры выправоджвалі з залі, апладзіравалі палітвязням. 

Праваабарончы цэнтр "Вясна" з дапамогай валанцёраў адсочваў гэты судовы працэс

Храналогія судовага працэса: 

Масавыя беспарадкі з дапамогай лазарных указак? Як праходзіць суд над валанцёрамі штаба Бабарыкі

Раніцай 13 красавіка судовае паседжанне пачалося з допыту абвінавачаных. Першым дапытвалі Ігара Ярмолава.

"З маіх рук ні адзін чалавек не атрымаў ніводнага прадмета". Пра што казаў у судзе палітвязень Мікалай Сасеў

Наступным у зале быў дапытаны Мікалай Сасеў. Ён распавёў пра падзеі тых дзён: чуў аб плануемых пратэстах пасля выбараў і дамовіўся сустрэцца з Ігарам Ярмолавым ў 20 гадзін 9 жніўня.

На судзе па справе аб "лазарных указках" Уладзіслаў Карэцкі даў паказанні

Палітвязень распавёў, што з Ігарам Ярмолавым знаёмыя каля года, пазнаёміліся на танцавальным мерапрыемстве, з Мікалаем Сасевым пазнаёміўся дзесьці за месяц да 9 жніўня, а з Дзмітрыем Канапелькам у дзень выбараў прэзідэнта. На масавыя мерапрыемствы 9, 10 і 11 жніўня выходзіў з іншымі фігурантамі справы, але закон не парушаў.

"Высновы аб выніках выбараў зрабіў на аснове статыстычных дадзеных, асабістым вопыце і здаровым сэнсе". Пра што ў судзе казаў Канапелька

19 красавіка ў працэсе працягнулі зачытваць пратаколы допытаў Уладзіслава Карэцкага з-за разыходжанняў у паказаннях абвінавачанага падчас папярэдняга следства і ў судзе.
Пасля быў дапытаны чацвёрты фігурант справы - Дзмітрый Канапелька.

"Я заўсёды ім ганарылася і ганаруся да гэтага часу". Што казалі сведкі ў судзе над валанцёрамі штаба Бабарыкі?

20 красавіка ў судзе па крымінальнай справе валанцёраў штаба Бабарыка, палітвязняў Ігара Ярмолава, Мікалая Сасева, Уладзіслава Карэцкага і Дзмітрыя Канапелькі пачаўся допыт сведкаў.

Малаткамі адкалупваць плітку, лазернымі ўказкамі свяціць у сілавікоў. У судзе аб масавых беспарадках выступіў яшчэ адзін сведка

21 красавіка ў рамках судовага працэсу па абвінавачванні палітвязняў Дзмітрыя Канапелькі, Ігара Ярмолава, Мікалая Сасева і Уладзіслава Карэцкага ў масавых беспарадках у якасці сведкі быў апытаны ўладальнік офіса па вул. Чэхава, 3 - Сяргей Лаўрыненка.

Сведка Юрый Васкрасенскі ўжо двойчы не з'явіўся ў суд па справе валанцёраў штаба Бабарыка

У судзе Маскоўскага раёна працягваецца разгляд крымінальнай справы ў дачыненні да валанцёраў штаба Віктара Бабарыка, палітвязняў Дзмітрыя Канапелькі, Ігара Ярмолава, Мікалая Сасева і Уладзіслава Карэцкага.

"У сваёй прафесійнай дзейнасці я засветы раблю пастаянна". Пра што распавяла ўрач-афтальмолаг у судзе па справе аб лазерных указках?

5 траўня ў судзе Маскоўскага раёна г. Мінска па крымінальнай справе палітвязняў Ігара Ярмолава, Мікалая Сасева, Уладзіслава Карэцкага і Дзмітрыя Канапелькі выступіла сведка – урач-афтальмолаг шпіталя МУС Інэса Вайцяховіч, якая распавяла, як лазерныя прамяні могуць уздзейнічаць на вочы.

"Мусара – гэта нешта непатрэбнае. І гэта людзі, якія заслугоўваюць такога абазначэння". Суд вывучыў матэрыялы па справе валанцёраў штаба Бабарыкі

Трэцяе пасяджэнне запар суд вывучае пісьмовыя матэрыялы – 10 тамоў – і рэчавыя доказы па справе. Сярод апошніх – кепкі, заплечнікі, пальчаткі, маска з тканіны, канфіскаваныя ў Ярмолава накаленнікі і накладкі на галёнкі для спартыўных трэніровак, шэсць лазерных указак, тэлефоны, ключы ад машыны і камп'ютарная тэхніка. Ні "вожыкаў", ні сталярных малаткоў, пра якія ішла гаворка ў судзе, у рэчдоках няма.

У судзе па справе аб "лазерных указках" прайшлі спрэчкі бакоў

Пракурор прасіў прызнаць Ігара Ярмолава, Уладзіслава Карэцкага, Мікалая Сасева і Дзмітрыя Канапельку вінаватымі і прызначыць пакаранне ў выглядзе пазбаўлення волі на тэрмін 5 гадоў ва ўмовах узмоцненага рэжыму.

"Чаму тады не казаць, што ўказкі – для здзяйснення акту тэрарызму?" Аргументы абароны ў спрэчках бакоў па справе валанцёраў штаба Бабарыка

Ніякіх доказаў таго, што абвінавачаныя дзейнічалі сумесна, узгоднена з мэтай іншага матэрыяльнага забеспячэння і ўдзелу ў масавых беспарадках у матэрыялах справы няма.

"Прама тут і цяпер вырашаецца мой лёс і лёс маіх сяброў". Ігар Ярмолаў і Мікалай Сасеў выступілі з апошнім словам у судзе

28 траўня ў судзе Маскоўскага раёна г. Мінска абвінавачаныя па крымінальнай справе аб лазерных указках выступілі з апошнім словам.

"Ні перад людзьмі, ні перад Богам маёй віны няма, і сумленне маё чыстае". Дзмітрый Канапелька ў апошнім слове ўзгадаў рэпрэсаванага прадзеда

У судзе Маскоўскага раёна па крымінальнай справе супраць валанцёраў штаба Бабарыкі 8 чэрвеня з апошнім словам выступіў дырэктар IT-кампаніі Дзмітрый Канапелька.