Жодзінскія галадоўнікі мяркуюць скончыць акцыю

2005 2005-06-06T10:00:00+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Сёньня трынаццаты дзень галадоўкі моладзевых актывістаў у Жодзіне. Акцыя пачалася 25 траўня на знак пратэсту супраць выключэньня дэмакратычнай моладзі з навучальных установаў краіны. Цяпер засталося тры ўдзельнікі: Зьміцер Чарткоў, Яўген Валкавец і Аляксандр Вінаградаў. Як паведамляе Радыё Свабода паводле аргкамітэту акцыі, 6.06 плануецца яе завяршыць.

Паводле іх уласных ацэнак, яны адчуваюць сябе здавальняюча. Аднак, паводле бацькоў і блізкіх гэтых юнакоў, яны бадзёрацца, а насамрэч іх здароўе выклікае трывогу. Так у мінулую пятніцу самы юны удзельнік акцыі 16-гадовы Павал Каранюхін таксама казаў, што са здароўем добра, але літаральна праз гадзіну ён страціў прытомнасьць. Толькі пасьля гэтага старэйшыя ўдзельнікі акцыі папрасілі прыпыніць яе непаўнагадовых. Дарэчы, зараз тыя, хто застаўся, праводзяць акцыю на прыватнай кватэры па праспэкце Леніна. Гаспадыня кватэры Тамара Красоўская так выказала сваё стаўленьне да галадоўнікаў: “Мне вельмі іх шкада. Я бачу іхныя пакуты. Я ім сказала: “Дзеці, падумайце добра. Ня варта жыцьцё губіць. Ніхто ні за каго ня адказвае, кожны адказвае за сябе. Вы павінны сур’ёзна падумаць. Як дарослыя”. Мне іх шкада. Я хварэю душой і сэрцам. І плачу. Як маці. Дзяцей гэтых добра ведаю. Вельмі добрыя дзеці. Вельмі шкада, што яны нікому не патрэбныя ў нашай дзяржаве”.

На гэтым настойваюць бацькі і блізкія галадоўнікаў. Таксама вельмі раілі ім спыніць галадоўку фактычна ўсе наведнікі, якія прыяжджалі ў Жодзіна ў часе акцыі. У прыватнасьці, на гэтым настойвалі сябры Рады беларускай інтэлігенцыі: Уладзімір Колас, Сяргей Законьнікаў, Лявон Баршчэўскі і Гергій Ліхтаровіч. А яшчэ прасілі жодзінскіх юнакоў не ахвяраваць здароўем замежныя дыпламаты, якія на 3.06 наведалі іх. Гэта прадстаўнікі амбасады ЗША у Беларусі, ад імя амбасадаў краінаў Эўразьвязу кіраўнік амбасады Чэхіі Уладзімір Румл, прадстаўнікі Офісу АБСЭ у Менску.

Якія папярэднія вынікі жодзінскай акцыі? Паводле назіральнікаў, да гэтай акцыі пра выключэньне з навучальных установаў прадстаўнікоў дэмакратычнай моладзі гаварылася як пра адзінкавыя і не зьвязаныя між сабою выпадкі. Жодзінская моладзь фактычна ўпершыню зьвярнула ўвагу грамадзтва, што ў сапраўднасьці – гэта не асобныя выпадкі, а зьява. А менавіта: супраць удзельнікаў моладзевага дэмакратычнага руху праводзіцца мэтанакіраваная кампанія па выключэньні іх з устаноў адукацыі. Толькі ў адным 60-тысячным горадзе Жодзіна сямёра юнакоў былі выкінутыя на вуліцу з такіх устаноў. Пасьля таго, як галадоўнікі заявілі гэтаму пратэст, высьветлілася, што і ў іншых гарадах ёсьць маладыя людзі, якіх адлічылі за ўдзел у дэмакратычным руху. Адным словам, зараз, паводле назіральнікаў, можна казаць пра дыскрымінацыю ў Беларусі моладзі, якая мае апазыцыйныя настроі. Інакш кажучы, улады хочуць, каб прадстаўнікі дэмакратычнай моладзі заставаліся невукамі. Якраз на гэта удзельнікі акцыі зьвярнулі ўвагу, у прыватнасьці, замежных дыпляматаў. У адказ кіраўнік амбасады Чэхіі Уладзімір Румл ад імя амбасадаў краінаў Эўразьвязу запэўніў галадоўнікаў, што дыпляматычныя місіі замежных краінаў, возьмуць, так бы мовіць, на кантроль пытаньне з выключэньнем у Беларусі з навучальных установаў дэмакратычнай моладзі па палітычных матывах. Галадоўка, паводле назіральнікаў, атрымала розгалас і ўнутры краіны.

У прыватнасьці, вось што зазначыў на гэты конт лідэр моладзевай арганізацыі “Правы альянс” Юрась Карэтнікаў: “Сапраўды, зараз у нас такая сытуацыя, што вельмі запалохана грамадзтва. Моладзь, нават калі яны выступае супраць ціску рэжыму, але яна баіцца страціць месца працы, месца вучобы. І вось такімі мужнымі крокамі жодзінская моладзь паказала, што ў прынцыпе можна змагацца, што ёсьць надзея на перамены. Я чуў водгукі студэнтаў, навучэнцаў менскіх установаў, інфармацыя да іх дайшла і ўсе проста захопленыя мужнасьцю гэтых людзей. Гэта яшчэ й штуршок, што ў прынцыпе ў Беларусі могуць адбыцца перамены. Сітуацыя ў Жодзіна паказвае, што грамадзтва падрыхтаванае, чакае такіх вось мужных крокаў і чакае сваіх герояў. Моладзь – гэта такая іскра, якая можа запаліць полымя, ў сэрцах усёй беларускай моладзі”.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international