Прынцып “дазволена тое, што не забаронена” – на выбарах не дзейнічае
Назіральніца з Брэста Ганна Багдановіч звярнулася ў УВК 36 Маскоўскага раёна Брэста па дазвол рабіць фотаздымку на ўчастку для галасавання.
З адказу, які атрымала Багдановіч, вынікае што ў Выбарчым кодэксе адсутнічае права назіральніка весці фота і відэаздымку на участку для галасавання.
На аргумент назіральніцы наконт “дазволена тое, што не забаронена” – было паведамлена, што гэты прынцып распаўсюджваецца ў звычайным жыцці і дзейнічае ў прыватным праве.
“Выбары Прэзідэнта – афіцыйная працэдура, парадак правядзення якой рэгламентаваны нарматыўна-прававымі актамі і камісія кіруецца іх палажэннямі”, - адказала назіральніцы старшыня участковай камісіі Вольга Белаглазава.
Яна паведаміла Багдановіч, што “дазваляе зрабіць толькі фота пячаткі на скрынцы для датэрміновага галасавання.”
У той жа час у Метадычным дапаможніку для ўчастковых камісій па выбарах Прэзідэнта Рэспублікі Беларусь, размешчаным на сайце ЦВК, асобна выдзелены пункт аб парадку ажыццяўлення назіральнікам фотаздымкі на ўчастку:
“Фота -, відэаздымка ў памяшканні ўчастковай камісіі ажыццяўляецца назіральнікамі ў наступным парадку: старшыня участковай камісіі загадзя вызначае месца, з якога назіральнікам дазваляецца зрабіць некалькі здымкаў, якія ілюструюць працэс галасавання і падліку галасоў. Пры гэтым назіральнік не павінен ствараць перашкоды для сябраў участковай камісіі і выбаршчыкаў… фота -, відэаздымка сябраў участковай камісіі, выбаршчыкаў без іх дазволу і дазволу прадстаўніка ўчастковай камісіі забараняецца.”
