Суды не сталі разбірацца са скаргамі Людмілы Кучура на парушэнне правоў яе асуджанага мужа

2020 2020-04-16T15:01:04+0300 2020-04-16T15:01:05+0300 be http://spring96.org/files/images/sources/kuchura_1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Людміла Кучура

Людміла Кучура

Адразу два пасяджэнні пра скаргах Людмілы Кучура на дзеянні службовых асоб МУС прайшлі ў судзе Цэнтральнага раёна г. Мінска ў канцы сакавіка. І абодва працэсы скончыліся вызначэннем аб спыненні вытворчасці па справе ў сувязі з непадведамаснасцю.

На што скардзілася Людміла Кучура?

У адной скарзе ў суд жонка асуджанага Людміла Кучура прасіла прызнаць неправамерным рашэнне міністра ўнутраных спраў Рэспублікі Беларусь Юрыя Караева аб адсутнасці парушэнняў у дзеяннях супрацоўнікаў ДВП у дачыненні да яе мужа Пятра Кучуры.

Жанчына накіроўвала скаргу міністру, у якой указвала, што адміністрацыя папраўчай калоніі №15, дзе ў той момант адбываў пакаранне Пётр Кучура, аказвае ціск на асуджанага. Так, за сем месяцаў 2019 года Пётр Кучура быў падвергнуты дысцыплінарным спагнанням 32 разы, што жонка асуджанага звязвае з абскарджаннем ім двух незаконна накладзеных спагнанняў у суд, а таксама з правядзеннем праверак па скаргах яе мужа. У сувязі з вынесенымі спагнаннямі Пётр Кучура быў пазбаўлены спатканняў са сваякамі, перадачаў, правёў восем месяцаў у ШІЗА і ПКТ, а пасля быў пераведзены ў турму №4 г. Магілёва.

Людміла Кучура ў звароце да Юрыя Караева ўказвала і на факты збіцця яе мужа начальнікам ПК №15 Аляксеем Лазарэнкам і на скланенне асуджанага да суіцыду. Звяртала ўвагу міністра на тое, што ўпраўленне ДВП па Магілёўскай вобласці ў сваю чаргу праводзіць фармальныя праверкі па скаргах яе і яе мужа.

"Кінулі на падлогу, не здымаючы штаноў, зрабілі ўкол"... Што яшчэ чакае Пятра Кучуру ў зняволенні?

У лютым Людміла Кучура падала шэраг скаргаў у барацьбе за правы свайго асуджанага мужа ў папраўчай калоніі №15 і турме №4 г. Магілёва.

У скарзе ў суд Людміла Кучура адзначыла, што рашэнне міністра ўнутраных спраў ушчамляе яе права паведаміць аб злачынстве, права на правядзенне праверкі па яе заяве, атрымаць матываванае рашэнне, а таксама азнаёміцца з матэрыяламі праверкі і абскардзіць рашэнне, калі яно будзе суправаджацца парушэннямі.

Іншая скарга ў суд Цэнтральнага раёна тычылася неправамернай адмовы начальнікам ГУУБ МУС Андрэем Паршыным у азнаямленні з матэрыяламі праверкі па звароце Людмілы Кучура ў МУС па факце здзяйснення ў дачыненні да яе мужа супрацьпраўных дзеянняў.

Андрэй Паршын, разгледзеўшы зварот жонкі асуджанага, 6 лютага адмовіў у азнаямленні з матэрыяламі праверкі ў сувязі з тым, што нібыта матэрыялы маюць грыф абмежаванага доступу.

У скарзе ў суд Людміла Кучура паведаміла, што не згодная з тым, што матэрыялы праверкі адносяцца да "службовай інфармацыі абмежаванага распаўсюда". Згодна з арт. 18-1 Закона "Аб інфармацыі, інфарматызацыі і абароне інфармацыі", да службовай інфармацыі абмежаванага распаўсюда адносяцца звесткі, якія тычацца дзейнасці дзяржаўнага органа, юрыдычнай асобы, распаўсюджванне і (або) прадастаўленне якіх могуць нанесці шкоду нацыянальнай бяспецы Рэспублікі Беларусь, грамадскаму парадку, маральнасці, правам, свабодам і законным інтарэсам фізічных асобаў, у тым ліку іх гонару і годнасці, асабістага і сямейнага жыцця, а таксама правам і законным інтарэсам юрыдычных асобаў, і якія не аднесеныя да дзяржаўных сакрэтаў.

Людміла Кучура звяртала ўвагу суда на тое, што ў адказе Андрэя Паршына на яе зварот не было пазначана, да якой менавіта катэгорыі могуць адносіцца звесткі, якія змяшчаюцца ў матэрыялах праверкі.

"Акрамя таго, пры азнаямленні мяне з матэрыяламі можна прадпрыняць меры па недапушчэнні распаўсюджвання тых звестак, якія могуць быць абгрунтавана аднесеныя да інфармацыі абмежаванага распаўсюда", – лічыць жанчына.

Яна прасіла суд прызнаць неправамернай адмову начальніка ГУУБ ў азнаямленні з матэрыяламі праверкі па яе звароту і абавязаць дзяржаўны орган прыняць меры па ліквідацыі дапушчаных парушэнняў.

Што вырашыў суд?

Абодва працэсы прайшлі ў адзін дзень – 25 сакавіка, у судзе Цэнтральнага раёна. Акрамя Людмілы Кучура на працэсах прысутнічалі тры прадстаўнікі МУС: Кірыл Міліцын, Аляксандр Крывулін і Сяргей Анісім.

Першую скаргу разгледзела суддзя Вольга Паланевіч, якая выслухаўшы бакі, вывучыўшы прадстаўленыя матэрыялы справы, прыйшла да высновы, што справа не падлягае разгляду ў парадку грамадзянскага працэсуальнага судаводства, у выніку чаго вытворчасць па справе трэба спыніць.

Суддзя адзначыла, што прыцягненне да дысцыплінарнай адказнасці работнікаў органаў унутраных спраў адносіцца да выключнай кампетэнцыі асобаў, пералічаных у п.п. 30-33 Дысцыплінарнага статута органаў унутраных спраў.

"Акрамя таго, правядзенне праверкі ў мэтах устанаўлення наяўнасці ў дзеяннях супрацоўнікаў ДВП прыкметаў крымінальна каральных дзеянняў, прадугледжаных Крымінальным кодэксам Рэспублікі Беларусь, адносіцца да выключнай кампетэнцыі органа крымінальнага пераследу.

Па дадзеных прычынах скарга заяўніка не можа быць разгледжаная ў парадку арт. 353 ГПК і Закона «Аб звароце грамадзянаў і юрыдычных асобаў", – указаў суд у сваім вызначэнні і спыніў справу з прычыны непадведамаснасці.

Другую скаргу разгледзеў суддзя Аляксандр Длужнеўскі. У сваім вызначэнні ён указаў, што судом устаноўлена, што Людміла Кучура нібыта абскарджвае дзеянні па аднясенні матэрыялаў праверкі па яе заяве да дакументаў, якія маюць грыф "Для службовага карыстання".

"Разам з тым, суд мяркуе, што аднясенне таго ці іншага дакумента да матэрыялаў з грыфам ДСП з'яўляецца выключна кампетэнцыяй органа, які праводзіў праверку, у дадзеным выпадку МУС.

На падставе выкладзенага, суд прыходзіць да высновы аб тым, што падстаў для разгляду скаргі не маецца з-за непадведамаснасці", – прыйшоў да высновы суддзя і спыніў вытворчасць па справе.

Людміла Кучура не згодная з такімі рашэннямі суда і ўжо падрыхтавала прыватныя скаргі ў Мінскі гарадскі суд. Яна мяркуе, што пастановы суда Центральнага раёна незаконныя і неабгрунтаваныя, у тым ліку і таму, што і Юрый Караеў, і Андрэй Паршын указалі, што іх адказы на скаргі жонкі асуджанага ў выпадку нязгоды могуць быць абскарджаныя ў суд. І акрамя суда няма больш іншых органаў, якія маглі б аднавіць парушаныя правы яе і яе мужа Пятра Кучуры.

Суд не ўбачыў парушэнняў у неналежным разглядзе Следчым камітэтам заявы Людмілы Кучура

19 сакавіка суд Партызанскага раёна г. Мінска разгледзеў скаргу Людмілы Кучура на неправамерныя дзеянні Следчага камітэта, які без належнай увагі перанакіраваў заяву аб здзяйсненні ў дачыненні да асуджанага Пятра Кучуры злачынства ў Дэпартамент выканання пакаранняў.

Апошнія навіны

Партнёрства

Сяброўства