Ці законна затрыманага айца Вікенція пакінулі на ноч у камеры? Аўдыё

2018 2018-11-28T17:29:35+0300 2018-11-28T17:46:23+0300 be http://spring96.org/files/images/sources/svyatary_vikencij.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Айцец Вікенцій (Віктар Кавалькоў). Фота ПЦ "Вясна"

Айцец Вікенцій (Віктар Кавалькоў). Фота ПЦ "Вясна"

Увечары 26 лістапада супрацоўнік Перашамайскага РУУС Мінска Сяргей Каваль затрымаў святара Беларускай аўтакефальнай праваслаўнай царквы айца Вікенція (Віктара Кавалькова) за тое, што ён прасіў міласціну ў жыхароў аднаго з дамоў горада. Міліцыянт палічыў, што такім чынам айцец Вікенцій, які мае другую групу інваліднасці, парушаў грамадскі парадак.

Святара прывезлі ў апорны пункт №78, дзе на яго склалі пратакол аб адміністрацыйным правапарушэнні (арт. 17.1 КаАП) і пратакол асабістага дагляду. Па словах айца Вікенція, ён паказаў міліцыянтам сваё пасведчанне інваліда другой групы, аднак тыя паставіліся да яго з недаверам.

“Рэакцыя міліцыянтаў на пасведчанне была такой, быццам бы я нейкі шарлатан. Хоць было зразумела, што яно сапраўднае. Было бачна, што для іх гэта не з’яўляецца дакументам”, - распавядае Віктар Кавалькоў.

Складаннем пратаколаў міліцыянты вырашылі не абмяжоўвацца і завезлі святара ў галоўны пастарунак Першамайскага РУУС, дзе пакінулі на ноч у камеры.

“Перад тым, як змясціць у камеру, з мяне знялі маё святарска адзенне, забралі ўсе крыжы (хоць па царкоўных канонах свецкім асобам нельга да іх дакранацца)”.

Сама камера, паводле святара, была невялікая, дзесьці памерам 2 на 2 метра. У камеры стаяць вельмі цвёрдыя лаўкі, на якіх практычна немагчыма было спаць. Пра коўдру, падушку ці нават пра матрац гутаркі не ішло.

“Ноччу ў камеру прывялі яшчэ аднаго затрыманага, п’янага, які быў без цёплага адзення. Таму аддаў яму сваё паліто, каб той не замёрз”.

Таксама святар распавёў, што з-за стрэсавага стану амаль не спаў у тую ноч і кепска сябе адчуваў (каля года таму ён перанес інсульт).

На наступны дзень Кавалькова адвезлі ў суд Першамайскага раёна, аднак на судзе той заявіў хадайніцтва аб допуску да справы адваката, і таму працэс перанеслі, а святара адпусцілі.

Новае паседжанне па справе Віктара Кавалькова мусіць адбыцца 30 лістапада. Ён лічыць сваё затрыманне незаконным і накіраваў з гэтай нагоды скаргу ў пракуратуру Першамайскага раёна.

Ці парушылі закон міліцыянты, якія затрымалі чалавека з інваліднасцю другой групы больш, чым на тры гадзіны? Як апынулася, адносна гэтага пытання ў беларускім заканадаўстве існуе прабел, адзначае юрыст Праваабарончага цэнтру “Вясна” Павел Сапелка.

“Працэсуальна-выканаўчы кодэкс аб адміністрацыйных правапарушэннях не забараняе затрыманне людзей з інваліднасцю 1 і 2 групаў на тэрмін больш за тры гадзіны. Аднак яго прымяненне ў гэтым выпадку неабгрунтаванае, бо гэтай катэгорыі грамадзян у якасці адміністрацыйнага спагнання не можа быць прызначаны арышт.

Вядома, гэта прабел заканадаўства, які замахваецца на асноўныя правы людзей з інваліднасцю: заканадаўцы выключылі іх арышт з пераліку магчымых спагнанняў, таму што ва ўмовах арышту гэтыя людзі будуць адчуваць дадатковыя пакуты, абумоўленыя інваліднасцю. А як жа быць з затрыманнем на тэрмін звыш трох гадзін, якое па сутнасці ідэнтычна арышту, калі затрыманыя ўтрымліваюцца ў такіх жа ўмовах у ЦІП або ІЧУ? Відавочна, яно будзе прычыняць такія ж пакуты. І таму людзі з інваліднасцю павінны быць уключаны ў катэгорыю асоб, у дачыненні да якіх прымяненне затрымання на тэрмiн больш за тры гадзіны недапушчальна”.

Павел Сапелка лічыць, што ў такой сітуацыі затрыманаму варта звяртацца ў Канстытуцыйны суд для вырашэння пытання аб парушэнні яго канстытуцыйных правоў у сувязі з такім прабелам ў заканадаўстве. А органам ўнутраных спраў рэкамендуе ўстрымлівацца ад прымянення працяглага затрымання людзей з інваліднасцю.

Апошнія навіны

Партнёрства

Сяброўства