У будынку Свіслацкага райвыканкама публічна асудзілі мужчыну за "абразу" Лукашэнкі
Стала вядома, што 38-гадовага Дзяніса Нікіту другога красавіка 2024 году асудзілі да трох гадоў пазбаўлення волі ў калоніі ва ўмовах строгага рэжыму. Яго прызналі вінаватым у абразе Лукашэнкі паводле ч. 1 арт. 368 Крымінальнага кодэсу.
Мужчыну судзілі публічна ў будынку Свіслацкага райвыканкама. Пра працэс паведаміла раённая газета: там распавялі, што на пасяджэнні прысутнічалі "прадстаўнікі грамадскасці" і СМІ. Дзяніс Нікіта прызнаў віну. Яго вінаватасць пацвярджалася паказаннямі сведак, а таксама запісамі персанальных відэарэгістратараў супрацоўнікаў Свіслацкага аддзела аховы, якія яго затрымлівалі. Прысуд агучыў старшыня Свіслацкага раённага суду Дзмітрый Цівунчык.
- Ад рукі Нікіты да супрацоўніка міліцыі цягнецца тонкі дрот. Невядома, якім чынам працуе гэтая "прылада"
- На гэтым фота бачна, што дрот цягнецца да бранзалета, замацаванага ў мужчыны на запясцях. Таксама абвінавачанага ахоўваюць супрацоўнікі ў бронікамізэльках
Дзяніса Нікіту затрымалі ўвечары 25 студзеня 2024 года за дробнае хуліганства. Яго даставілі ў дзяжурную частку РАУС. ён не быў згодны з затрыманнем і нібыта пачаў выказваць на адрас супрацоўнікаў міліцыі абразы і пагрозы, пры тым згадаўшы Лукашэнку. Паводле версіі міліцыі, 38-гадовы мужчына рабіў гэта працяглы час і неаднаразова яго зняважыў. У выніку была пачатая крымінальная справа.
- "Прадстаўнікі грамадскасці", якія прысутнічалі на пасяджэнні
Паведамляецца, што гэта ўжо 11-я судзімасць абвінавачанага. Ён быў судзімы за крадзяжы, катаванне, пагрозу забойствам, а таксама за парушэнне патрабаванняў прэвентыўнага нагляду, неаднаразова прыцягваўся да адміністрацыйнай адказнасці. Акрамя таго, мужчына пазбаўлены бацькоўскіх правоў у дачыненні да дваіх дзяцей.
- Суддзя Дзмітрый Цівунчык агучвае прысуд
Вядома, што Дзмітрый Цівунчык таксама асудзіў палітвязня Яўгена Буйніцкага да 4,5 гадоў калоніі за дапамогу беларусам эвакуявацца ад пераследу ў Літву, а палітвязня Вадзіма Ермашука (блогера Vadimati) — да трох гадоў калоніі за ягоныя выказванні.
