Дайджэст вызваленых: 35 палітвязняў у студзені выйшлі на волю па заканчэнні тэрміну

На дадзены момант у Беларусі налічваецца 1416 палітвязень, а колькасць іх павялічваецца амаль штотыднёва. Пры гэтым кожны месяц некалькі дзясяткаў палітвязняў выходзяць з месцаў зняволення або па заканчэнні тэрміну, або пасля суда да накіравання ў папраўчую ўстанову адкрытага тыпу (на "хімію") ці пачатку адбыцця тэрміну на "хатняй хіміі". Па данных "Вясны", у студзені на волю выйшлі мінімум 35 чалавек, якія цалкам адбылі свае тэрміны, а двое з іх правялі за кратамі больш за тры гады. Яшчэ дзве жанчыны былі асуджаныя да "хатняй хіміі" і вызваленыя з СІЗА. За што палітвязні адбывалі тэрміны і колькі іх утрымлівалі ў месцах няволі — распавядае "Вясна" ў штомесячным дайджэсце. 

Палітзняволеная Зінаіда Міхнюк — 1 год, 10 месяцаў і 4 дні ў зняволенні

Зінаіда — актывістка прафсаюза РЭП, была затрымана 25 сакавіка 2022 пасля вобшукаў у яе дома і на офісе арганізацыі. Жанчыну да суда змясцілі ў СІЗА № 7 Брэста. Жанчыну абвінавацілі ў абразе Лукашэнкі па ч.1 арт. 368 Крымінальнага кодэкса. У траўні 2022 года суд прызначыў палітзняволенай два гады калоніі.

Тэрмін Зінаіда адбывала ў гомельскай калоніі № 4. Па інфармацыі "Берасцейскай Вясны", 29 студзеня палітзняволеная выйшла на волю, цалкам адбыўшы тэрмін.

Палітвязень Андрэй Бяляўскі — 1 год, 8 месяцаў і 8 дзён у зняволенні 

У судзе Бабруйскага раёна і г. Бабруйска 22 жніўня 2022 года вынеслі прысуд TikTok-блогеру — два гады калоніі ва ўмовах агульнага рэжыму. Згодна з версіяй абвінавачвання, Бяляўскі "размясціў у сацыяльнай сетцы Tik-Ток два відэаролікі з абразамі ў адрас Лукашэнкі" (арт. 368 КК).

Андрэя затрымалі наўпрост на працы — у ягонай уласнай роварнай краме "Веласпортмайстар". Разам з Бяляўскім забралі і яго непаўналетняга сына. Потым сына адпусцілі — аддалі бабулі з дзядулем. Пасля затрымання ГУБАЗіК захапіў акаўнт Бяляўскага ў TikTok.

Андрэй 5 студзеня выйшаў на волю з віцебскай калоніі № 3. Відэа са дня вызвалення з'явілася ў TikTok.

Палітвязень Аляксандр Бабіч — 3 гады, 3 месяцы і 19 дзён у зняволенні

Берасцейца абвінавацілі паводле артыкула 363 КК (супраціў супрацоўніку органаў унутраных спраў) —нібыта нагою двойчы ўдарыў амапаўца. Згодна з матэрыяламі, гэтымі дзеяннямі мужчына нанёс сілавіку Русілаву “фізічны боль і маральныя пакуты”.

У снежні 2020 года яму прысудзілі тры з паловай гады калоніі. Свой тэрмін Аляксандр адбываў у віцебскай калоніі № 3. 9 студзеня палітвязень выйшаў на волю, піша "Берасцейская Вясна".

Палітвязень Аляксандр Лучыновіч — 1 год, 9 месяцаў і 13 дзён у зняволенні

Аляксандр — праваднік рэзерву з Гомеля. Яго затрымалі 31 сакавіка 2022 года на працы ў Гомельскім аддзяленні Беларускай чыгункі. Спачатку яго асудзілі да адміністрацыйнага арышту, а потым перазатрымалі ў межах крымінальнай справы паводле ч. 1 арт. 361-4 КК (Садзейнічанне экстрэмісцкай дзейнасці). Прычына — перадача фота расійскай вайсковай тэхнікі тэлеграм-каналу "Беларускі Гаюн".

У ліпені 2022 года Лучыновіча асудзілі да двух гадоў зняволення. 13 студзеня 2024 года Аляксандр выйшаў на волю з магілёўскай калоніі № 15.

Палітвязень Арцём Такарчук — 3 гады, 3 месяцы і 22 дні ў зняволенні 

У лістападзе 2020 года мінскага архітэктара асудзілі да трох з паловай гадоў калоніі за супраціў салдату на "Маршы герояў" (ч. 2 арт. 363 КК) .

Калі салдаты пачалі атачаць пратэстоўцаў на вуліцы Мельнікайтэ і затрымліваць іх, у натоўпе пачалася паніка, некаторыя пачалі разбягацца і падаць. Па словах Арцёма Такарчука, ён хацеў дапамагчы і разняць упалых людзей.

Але яго жорстка затрымалі, пасля чаго ў бальніцы яму наклалі швы на галаву. Праз два дні яго зноў затрымалі – ужо ў межах крымінальнай справы. І пасля гэтага затрымання яго дастаўлялі са Следчага камітэта ў бальніцу, дзе дыягнаставалі страсенне мозгу, закрытую чэрапна-мазгавую траўму, шматлікія ўдары і гематомы па ўсім целе.

Тэрмін Арцём адбываў у магілёўскай калоніі № 15, адкуль выйшаў на волю 6 студзеня.

Дзве палітзняволеныя выйшлі на волю пасля суда

У студзені беларускія суды ў абсалютнай большасці прызначалі палітвязням пазбаўленне волі. Толькі дзве палітзняволеныя жанчыны ў мінулым месяцы выйшлі на волю з СІЗА пасля суда — ім прызначылі "хатнюю хімію". Але гэтыя дадзеныя могуць быць няпоўныя, бо не ўсе вынікі судоў над палітвязнямі пакуль вядомыя праваабаронцам. Гэта:

• Ксенія Рыжык — два з паловай гады "хатняй хіміі";
• Ганна Чаркас — два з паловай гады "хатняй хіміі".

Каму з былых палітвязняў цяпер патрэбна фінансавая дапамога?

Дапамога былому палітвязню адкрыць сваю справу ў Беларусі

Мужчыну звольнілі з працы і адмаўляюцца браць назад, бо баяцца звязвацца з “палітычнымі”.

Дапамога студэнту, асуджанаму за ўдзел у мірных пратэстах

Калі хлопец не знайдзе грошай на жыллё, то з вялікай верагоднасцю яго чакае змена рэжыму з «хатняй хіміі» на больш строгі.

Падтрымка сям'і палітвязня, у якой дзіця нарадзілася без бацькі

Мужчына з'ехаў з краіны і цяпер спрабуе пабудаваць новае жыццё.

Дапамога былому палітвязню авалодаць новай прафесіяй

Мужчына мае патрэбу ў фінансавай дапамозе для аплаты медыцынскіх паслуг, навучання і арэнды жылля на першы час

Дапамога былому палітвязню Станіславу Падзімаскасу

Хлопец плануе пайсці на курсы мовы і аднавіцца ў спецыяльнасці.