Новая крымінальная справа супраць Дзмітрыя Паліенкі і арышт на 15 сутак. Храналогія падзей Відэа Дапоўнена

2020 2020-07-08T14:43:00+0300 2020-07-08T15:21:43+0300 be http://spring96.org/files/images/sources/palienka_sud0807.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У 7 гадзін раніцы 8 ліпеня ў двор, дзе пражываюць актывісты Дзмітрый і Наста Паліенкі, увайшлі некалькі супрацоўнікаў міліцыі з Маскоўскага РУУС. Усе чацвёра былі ў цывільнай вопратцы. Яны прапанавалі актывісту “выйсці і пагаварыць”. Пра мэты размовы нічога не паведамлялі.

Супрацоўнікі міліцыі на двары дома, дзе пражывае Дзмітрый Паліенка. Скрыншот з відэастрыму.
Супрацоўнікі міліцыі на двары дома, дзе пражывае Дзмітрый Паліенка. Скрыншот з відэастрыму.

У адказ на катэгарычнае патрабаванне прадставіць павестку, двое з іх на аўтамабілі з’ехалі чамусці ў Першамайскі РУУС і неўзабаве прывезлі павестку Дзмітрыю Паліенку, у якой пазначана, што з’явіцца трэба ў 15 гадзін 8 ліпеня для правядзення “праверачнага мерапрыемства” ў Маскоўскі РУУС.

Пакінуўшы павестку Насце супрацоўнікі міліцыі з’ехалі.

Усё раніцу Наста вяла відэазапіс размовы, які змешчаны з фэйсбуку. 

У гэты ж дзень у судзе Першамайскага раёна ў 10.00 пачаўся разгляд адміністрацыйнай справы Дзмітрыя Паліенкі па артыкуле 23.34 КаАП - за ўдзел у несанкцыянаваным масавым мерапрыемстве. Прычынай складання пратаколу стала фота з рондалем, якое ён выклаў у сацыяльныя сеткі. Справу разглядае суддзя Анастасія Ляйкоўская. У залі знаходзяцца канвойныя.

Паліенка сцвярджае, што міліцыя не азнаёміла яго з матэрыяламі справы і не патлумачыла сутнасць правапарушэння. На гэта ён разам з адвакатам падаў скаргу.

Дзмітрый Паліенка ў судзе 8 ліпеня
Дзмітрый Паліенка ў судзе 8 ліпеня

Паліенка азнаёміўся з матэрыяламі справы толькі ў судзе. Падчас азнаямлення супрацоўнік міліцыі Сяргей Астафьеў груба сарваў з заплечніка Дзмітрыя плакат з надпісам "Такіх як я 97%". У выніку суддзя накіравала пратакол на дапрацоўку. 

Але "дапрацоўка" адбылася прама ў будынку суда падчас перапынку. Міліцыянты заблакавалі ў калідоры суда ўсіх прысутных - і Паліенку, і яго адваката, і слухачоў, каб ніхто не мог выйсці. І вельмі хутка перапісалі пратакол. Цяпер у ім напісана тое, што Дзмітрый размясціў заклік у сацыяльных сетках да флэшмобу: 23 чэрвеня заклікаў выходзіць увечары на балкон і грымець рондалямі. Пасля гэтага ўсіх загналі назад у судовую залу.

Калі пасяджэнне зноў пачалося, адвакат хадайнічаў аб разглядзе скаргі на неазнаямленне з матэрыяламі справы. Суддзя згодна і дае 20 хвілін на перапынак. Тады нарэшце калідор адчыняецца і ўсе жадаючыя выходзяць з будынку суда. Працяг прызначаны на 11.30.

Пасля працягу Дзмітрый сказаў, што не згодзен з пратаколам усё роўна і адмовіўся далей удзельнічаць у судовым пасяджэнні. Ён направіўся да выхада, і ў калідоры яго схапілі 6 супрацоўнікам АМАПу і гвалтоўна пацягнулі ў міліцэйскую машыну. Дзмітрыя звезлі ў невядомым накірунку на серабрыстай "шкодзе". Пры гэтым працэс яшчэ не скончыўся.

Праз палову гадзіны Дзмітрыя Паліенку прывезлі назад у суд. Ён кажа, што амапаўцы яго збілі.

Пасяджэнне працягнулася. Сведкам выступае маёр з Першамайскага РУУС Іван Квачан, які нібыта пабачыў пост на старонцы Палінекі з заклікам да ўдзелу ў флэшмобе. Суддзя абвесціла перапынак для прыняцця рашэння. 

Падчас перапынку Дзмітрыю не далі выйсці з будынку суда, і зноў завялі ў машыну з амапаўцамі. Ён паспеў паведаміць праваабаронцам, што яго вазілі ў Маскоўскі РУУС (па той самай позве, якую ўручылі ранкам) і апыталі ў межах заведзенай крымінальнай справы па абразе супрацоўніка міліцыі. 

Пасля перапынку суддзя агучыла рашэнне - 15 сутак арышту. Яго пад канвоем забралі адбываць пакаранне.

Дапоўнена: Тэлеграм-канал "Еўрапейскай Беларусі" паведамляе, што па стане на 15.00 у доме, дзе цяпер жыве Дзмітрый Паліенка, праходзіць ператрус у рамках распачатай супраць яго крымінальнай справы.

Новая крымінальная справа супраць Дзмітрыя Паліенкі і арышт на 15 сутак. Храналогія падзей

Апошнія навіны

Партнёрства

Сяброўства