Тыдзень пачынаецца з судоў: Новыя 15 сутак "Шэраму кату" і вялікія штрафы ўдзельнікам акцый за незалежнасць Фота Дапоўнена

2020 2020-01-27T17:21:00+0300 2020-01-28T14:38:45+0300 be http://spring96.org/files/images/sources/sudy_barshchauski_sadouski.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Апошні тыдзень студзеня пачаўся з новых судоў над удзельнікамі акцый у падтрымку незалежнасці. 

Каго судзяць 27 студзеня?

Мінск, суд Цэнтральнага раёна

У 9.15 пачаўся суд над пісьменнікам Лявонам Баршчэўскім па ч. 1 арт. 23.34 КаАП. У мінулы раз гэтую справу адправілі на дапрацоўку праз вялікую колькасць памылак у пратаколе. Зараз пратакол перапрацавалі і справу зноў перадалі ў суд. Суддзя - Іван Касцян. Працэс вёўся на беларуская мове. Сведкамі былі амапаўцы Сяргей Сенько і Віталь Мяжонны. У суд Баршчэўскі прынёс чатыры шапкі і запытаўся ў сведкаў, у якой ён быў? Пасля перапынку суддзя абвесціў вынік - 30 базавых велічынь штрафу (810 рублёў).

barshchauski_sadouski.jpg
Лявон Баршчэўскі і Пётр Садоўскі

У той жа час распачаўся суд над мовазнаўцам, былым дэпутатам Пятром Садоўскім па частцы 1 арт. 23.34 КаАП (працяг суда за ўдзел у акцыі 7 снежня па дапрацаваным пратаколе); Разглядала справу суддзя Таццяна Акавітая. Пётр Садоўскі не прызнаў сваю віну. Спасылаўся на Канстытуцыю і Міжнародны пакт аб грамадзянскіх і палітычных правах. Адначыў, што калі распрацоўвалі Канстытуцыю, ён прадстаўляў гэты Пакт перад Вярхоўным Саветам.

Па яго словах, 7 снежня ён на плошчы спяваў песню на словы Янкі Купалы "А ў бары, у бары тры дарожанькі". Ён адзначыў, што міліцыя сфабрыкавала пратакол супраць яго. "Ілжывы экспромт" - так назваў гэты пратакол Садоўскі.

Сведкамі па справе выступілі міліцыянты А. Кавальчук і В. Светкін. Апошні сказаў на судзе, што "Садоўскі выступаў пасродкам вымаўлення прамовы".

Вынік - штраф у 30 базавых велічныь (810 рублёў)

sudy_barshchauski_sadouski.jpg
Аўтарытэтная група падтрымкі ў судзе Цэнтральнага раёна

Мінск, суд Ленінскага раёна

10.00 - Дзмітрый Казлоў (блогер "Шэры кот"), ч. 3 арт. 23.34 КаАП. Суд за акцыю ў Мінску 8 снежня. Суддзя Таццяна Шоцік. Сам Казлоў на пасяджэнні не з'явіўся, яго інтарэсы прадстаўляла адвакат. Яна заявіла адвод суддзі, але ён не быў задаволены. 

Сведкамі выступілі міліцыянты Ціханаў Андрэй і Каранеўскі Дзмітрый. Ціханаў адмаўляўся сказаць, як ён апазнаў Казлова, бо ў рапарце ўказана, што асобу вызначыў пазней, а у судзе ён сказаў, што пазнаў блогера адразу. Шмат на якія пытанні адказваў "Не памятаю". Каранеўскі паведаміў у судзе, што ведаў "Шэрага ката" як блогера, а пазней было вызначана, што гэта менавіта Казлоў. Ніхто з іх не змог назваць дзеянні ўдзельнікаў масавага мерапрыемства, якія парушалі б грамадскі парадак, акрамя таго, што яны там проста знаходзіліся.

Адвакат у выступе звярнула ўвагу суда на тое, што Казлоў рэалізоўваў свае правы, гарантаваныя Канстытуцыяй і Міжнародным пактам аб грамадзянскіх і палітычных правах. А таксама на тое, якім чынам былі вынесеныя рашэнні на папярэдніх судовых паседжаннях (7 арыштаў). Але гэта ніяк не паўплывала на вынік суда - яшчэ 15 сутак арышту.

10.00 - Мікалай Статкевіч, ч. 3 арт. 23.34 КаАП. Паўторнае пасяджэнне суда за ўдзел у акцыі 20 снежня. Суддзя - Аляксей Кісляк.  Мікалай Статкевіч, як і ў папярэдні раз, на суд не прыйшоў, хоць яго "выклікалі і позвай, і смс". У судзе абвешчаны перапынак да высвятлення прычыны няяўкі асобы. Пасля паўтарагадзіннага перапынку пасяджэнне працягнулася, яго вырашылі правесці без Статкевіча. Апыталі сведку - старэйшага інспектара Івана Скараходава, які распавёў, што перадаваў позву з суд жонцы Статкевіча. Пасля гэтага суддзя Аляксей Кісляк вынес рашэнне - 50 базавых велічынь штрафу (1350 рублёў).

12.00 - Андрэй Кудзік, ч. 3 арт. 23.34 КаАП. Суд за акцыю ў Мінску 8 снежня. Суддзя - Аляксей Кісляк. Андрэй Кудзік на пасяджэнне не прыехаў. Было прынята рашэнне разглядаць справу ў яго адсутнасць. Сведка амапавец Ціханаў заявіў, што пазнаў Кудзіка, ён падчас акцыі "выкрыкваў лозунгі "Верым, можам, пераможам", "Ганьба" і г.д. Наступны сведка - Дзмітрый Каранеўскі - пацвердзіў словы папярэдняга амапаўца. Вынік - 40 базавых велічынь (1080 рублёў).

Мінск, суд Партызанскага раёна

11.00 - Вячаслаў Сіўчык, арт. 23.34 КаАП (працяг суда за акцыю ў Мінску 8 снежня). Суддзя - Анатоль Барысёнак. Сіўчык у чарговы раз не прыйшоў на суд (бо знаходзіца за мяжой) і пасяджэнне з чарговы раз перанеслі. На гэты раз на 10.30 трэцяга лютага.

Мінск, суд Першамайскага раёна

11.00 - Дзіяна Серадзюк, ч. 3 арт. 23.34 КаАП (суд за ўдзел у акцыі 20 снежня ў Мінску). Суддзя - Максім Трусевіч. Вынік - 50 базавых велічынь (1350 рублёў).

Гомель, суд Чыгуначнага раёна

16.30 - Барыс Анікееў, ч. 1 арт. 23.34 КаАП (суд за ўдзел у акцыі 20 снежня). Вынік - 15 базавых велічынь (405 рублёў).

Суды за акцыі ў падтрымку незалежнасці не спыняюцца. Расклад на студзень і вынікі

Праваабаронцам сталі вядомыя новыя даты судоў за акцыі ў падтрымку незалежнасці, якія праходзілі ў Мінску на працягу снежня 2019 года. Таксама працягваюць судзіць віцебскіх актывістаў, якія выйшлі на акцыю 29 снежня ў сваім родным горадзе. Мы зноў склалі спіс судовых пасяджэнняў па сумнавядомым артыкуле 23.34 КаАП (удзел у несанкцыянаваным масавым мерапрыемстве), якія мусяць адбыцца бліжэйшым часам.

Па падліках праваабаронцаў “Вясны”, за снежань і студзень у краіне адбылося больш за 160 судовых пасяджэнняў, дзе судзілі актывістаў за ўдзел у акцыях 7,8,20 і 21 снежня. На 27 студзеня агульная сума штрафаў, атрыманых удзельнікамі акцый, склала 126927,5 рублёў (амаль 60000$)11 чалавек асуджаны агулам на 315 сутак арышту


  Навіны ад Spring96.org у Telegram. Падпішыся на наш канал https://t.me/viasna96 

Апошнія навіны

Партнёрства

Сяброўства