“Кухня TV”: прэзідэнцкія выбары і незалежнае назіранне ў Беларусі
Уладзімір Лабковіч, Валянцін Стэфановіч і Дзяніс Садоўскі ў праграме “Кухня-TV”.
Чарговы выпуск праваабарончага відэапраекта “Кухня-TV” прысвечаны абмеркаванню і ацэнцы правядзення прэзідэнцкай выбарчай кампаніі ў Беларусі з пункту погляду назіральнікаў.
Прэзідэнцкія выбары-2015 адбываюцца ў новай геапалітычнай рэальнасці, і гэтае іх адрозненне ад папярэдніх выбарчых кампаній накладае свой адбітак. Каардынатары дзвюх незалежных кампаній па назіранні за выбарамі адзінадушна адзначаюць пагаршэнне сітуацыі ў параўнанні з прэзідэнцкай кампаніяй 2010 года. Гэта і нежаданне ўключаць у склад участковых і тэрытарыяльных камісій прадстаўнікоў дэмакратычных сілаў, і небывалы адміністратыўны рэсурс пры зборы подпісаў за дзеючага прэзідэнта Аляксандра Лукашэнку, і татальная падкантрольнасць уладам усіх выбарчых працэдураў.
Нават тыя сціплыя змены, якія былі ўнесеныя ў выбарчае заканадаўства ў 2013 годзе, на практыцы носяць фармальны характар і не ўплываюць на канчатковы вынік выбараў.
Пра асаблівасці сёлетняй выбарчай кампаніі разам з намеснікам старшыні ПЦ "Вясна" Валянцінам Стэфановічам разважаюць каардынатар кампаніі “Праваабаронцы за свабодныя выбары” Уладзімір Лабковіч і каардынатар кампаніі «Права выбару-2015» Дзяніс Садоўскі.
Глядзіце новы выпуск “Кухні TV”.
