“Проста вінаваты, і ўсё тут”
Жыхару Гародні Руслану Пяцько прыйшла чарговая судовая адмова. Гэтым разам – з Вярхоўнага суда Рэспублікі Беларусь, дзе Руслан абскарджваў рашэнні судоў ніжэйшых інстанцый, якія прызналі яго вінаватым нібыта ў адмове праходзіць дактыласкапічную рэгістрацыю.
Вярхоўны суд прыняў рашэнне не на карысць Руслана, амаль прадубляваўшы ранейшыя рашэнні па гэтай справе.
– І ў гэтых паперах ні слова не гаворыцца па сутнасці маёй скаргі, – абураецца гарадзенец. – Нават не разглядаюцца мае аргументы. Па сутнасці, амаль даслоўна паўтараецца тое, што было сказана першым судом. Навошта тады пакідаць чалавеку надзею, што ў вышэйшых інстанцыях хаця б разгледзяць яго аргументы? А так усе судовыя адказы можна абагульніць у адно слова – вінаваты. Проста вінаваты, і ўсё тут.
Руслан Пяцько паведаміў, што пакідае за сабой права звярнуцца ў міжнародныя структуры.
