КДБ папярэдзіла магілёўскага Зміцера Салаўёва за ўскладаньне кветак
Зміцер Салаўёў, старшыня Магілёўскай абласной арганізацыі ПБНФ
Намесьнік магілёўскай гарадской суполкі партыі БНФ Зміцер Салаўёў сёньня атрымаў папярэджаньне ў абласным упраўленьні КДБ. Папярэджаньне актывісту вынесенае за неаднаразовыя спробы ўдзелу ў несанкцыянаваных масавых мерапрыемствах. Такімі мерапрыемствамі супрацоўнік КДБ палічыў ўскладаньні кветак 25 сакавіка і 26 сакавіка мінулага году да памятных знакаў у Магілёве.
Разам з Салаўёвым у якасці грамадскага прадстаўніка ў КДБ патрапіў і праваабаронца Барыс Бухель. Прычым, дазваляючы прысутнічаць пры размове яму паведамілі: “Бачыце, якое ў нас пацяпленьне, нават Вам не адмаўляем прысутнічаць”.
Магілёскія праваабаронцы паведамляюць, што папярэджаньне будзе абскарджанае ў судовым парадку.
