Івана Крука асудзілі, нават не дапытаўшы сьведкі

2010 2010-07-07T10:29:28+0300 1970-01-01T03:00:00+0300 be http://spring96.org/files/images/sources/ivan_kruk.jpg
Іван Крук

Іван Крук

Астравецкаму актывісту Івану Круку прысудзілі 1 мільён 50 тысяч рублёў штрафу за паклёп падчас выбарчай кампаніі на чыноўніка з райвыканкаму.

Іван Крук падчас выбарчай кампаніі пісаў скаргу ў абласную камісію ад імя свайго выбарца Ўладзімера Маскевіча на кіраўніка спраў райвыканкаму Міхаіла Зімніцкага.

Маскевіч сьцьвярджаў, што Зімніцкі прымусіў яго адмовіцца ад подпісу, пастаўленага за вылучэньне ў кандыдаты Івана Крука. Потым, са слоў Крука, пад ціскам Зімніцкага Маскевіч падпісаўся пад новым лістом, у якім сьцьвярджалася, што ніякага ціску не было. І тады прадстаўнік раённай вэртыкалі падаў у суд на Івана Крука за паклёп.

На першае паседжаньне суду не прыйшоў сам Зімніцкі, а сёньня не было галоўнага сьведкі - Маскевіча. Але справу разгледзелі і безь яго. Іван Крук хадайнічаў, каб суд дапытаў іншых сьведак, якія прыйшлі ў суд, але ў гэтым яму было адмоўлена:

“Я лічу, што суд адбываўся па заранёў падрыхтаваным сцэнары. Ну чаму сёньня на працэсе не было галоўнага і адзінага сьведкі? Бяруцца пад увагу толькі паказаньні зацікаўленага боку, вось і ўсё”.

У залі суду сёньня знаходзіліся Мікалай Уласевіч і Людміла Шушко, якія таксама вылучаліся падчас выбарчай кампаніі кандыдатамі ў дэпутаты раённага савету. Як яны кажуць, іх не зарэгістравалі з гэткіх жа прычын, як і Івана Крука. Гэтымі абставінамі яны зьбіраліся падзяліцца з судзьдзём, але той не захацеў іх выслухаць.

Мікалай Уласевіч уражаны тым, як адбываўся сёньня суд. Зь яго слоў, нават неюрысту было відаць, што суд вядзецца на карысьць Зімніцкага, і судзьдзя сам дапамагаў скаржніку фармуляваць, у чым той бачыць паклёп Івана Крука:

“Яны добра ведаюць пра тое, што трэба абараніць ня столькі гэтага Зімніцкага, колькі сыстэму фальсыфікацыі выбараў, якая існуе ня толькі ў нашым раёне. На іхні погляд, мы зрабілі самую страшную справу, заявіўшы, што такія, як Зімніцкі, робяць фальсыфікацыі”.

Людміла Шушко сказала, што ёй было сорамна сядзець у залі суду і яна выйшла. Зь яе слоў, падчас выбарчай кампаніі яе не зарэгістравалі з тых самых прычын. Потым яна аб'яжджала людзей і пыталася, чаму тыя сьведчылі, што ня ставілі за яе подпісы. Аказалася, што людзі першы раз пра гэта чуюць:

“Я наагул ня вытрывала і выйшла з залі. Бо твар райвыканкаму ў асобе Зімніцкага - гэта ня твар райвыканкаму. Жудасная рэч, што ён казаў. Нават тое, што нібыта Крук зьбіраў подпісы ад выбарцаў за бутэльку гарэлкі. Я ня ведаю, чаму Крук не падаў адразу ў суд за паклёп. Гэта проста жах, як Зімніцкі прыніжаў Крука”.

Іван Крук заявіў, што зьбіраецца абскарджваць рашэньне Астравецкага раённага суду.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international