У Пінску працягваецца пераслед Алеся Рамановіча

2010 2010-06-09T12:33:21+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Сябра Партыі БНФ з Пінску Алесь Рамановіч паведаміў, што на працягу трох апошніх дзён супрацоўнікі КДБ і міліцыі рознымі спосабамі спрабуюць даставіць яго ў ГАУС. Пры гэтым да апошняга яны спасылаліся на адміністратыўную справу, у якой Рамановіч фігуруе як падазраваны, аднак афіцыйную позву на патрабаванне актывіста ўпарта не дасылалі. І ён нікуды ўпарта не ішоў. І сёння позву яму, нарэшце, уручылі.

У позве ўказана, што сёння, 9 чэрвеня, Алесь павінен з’явіцца ў 15.00 да ўчастковага інспектара міліцыі Русіна і выклікаецца ён у якасці абвінавачанага па адміністратыўнай справе.

Ціск на актывіста з боку міліцыі і КДБ пачаўся яшчэ ў красавіку, калі на кватэры яго знаёмага быў праведзены ператрус з канфіскацыяй перыёдыкі, літаратуры, вінчэсцераў з кампутараў.

- Пасля гаспадара кватэры некалькі разоў выклікалі ў міліцыю і праз яго ўчастковы прасіў, каб я падыйшоў таксама. Але я адказаў, што без позвы не пайду, каб той яму так і перадаў, - узгадвае А.Рамановіч.

Літаральна гэтымі днямі спецслужбы ізноў з’явіліся на гарызонце. Алесь распавёў, што ў панядзелак, 7 чэрвеня, бліжэй да 22.00, калі вяртаўся з лецішча дадому, да яго пад’ехала машына серабрыстага колеру. З машыны выйшаў супрацоўнік КДБ, якога Рамановіч бачыў не ўпершыню - ён прысутнічаў пры красавіцкім ператрусе і некалькі разоў “выпадкова” сустракаў актывіста ў горадзе. Як распавёў Алесь, супрацоўнік КДБ сказаў, што “прыехаў паглядзець, як тут жывеце”, у размове даў зразумець, што ведае розныя падрабязнасці з жыцця яго сям’і, і падкрэсліў, што “так, усё ведаю, праца ў мяне такая”.

Пасля ён прапанаваў Рамановічу сесці ў машыну і праехаць.

- Я запытаўся, ці ёсць у яго нейкая пастанова, ордэр, позва. Адказаў, што нічога няма. Я адказаў, што нікуды не паеду. А ён мне: “А я вас магу і так затрымаць, маю права”. Па-першае, вы такога права не маеце, кажу, а па-другае, я яшчэ маю права на адваката, дасылайце позву, і я прыйду з адвакатам, калі што. Не, вы сядайце, настойваў ён. І тут якраз вярталася з лецішча мая маці. Я ёй крыкнуў, што мяне забіраюць. Маці пачала лямантаваць, выйшаў сусед. Пад ціскам маці і суседа ён з’ехаў, - распавядае А.Рамановіч.- Перад гэтым ён патэлефанаваў па мабільнаму, відаць, у міліцыю. Сказаў, маўляў, ён ужо дома, прыязджайце, назваўшы мой адрас.

Калі прыехалі супрацоўнікі міліцыі, Алесь Рамановіч ужо зачыніўся ў доме. Па яго словах, хвілін 15 яны хадзілі каля хаты, пастаялі каля зачыненай каліткі і з’ехалі. Увечары яму ізноў ператэлефанаваў супрацоўнік КДБ. З размовы з ім Рамановіч даведаўся, што на яго адрас нібыта дасылаліся дзве позвы, але ён праігнараваў іх. Актывіст сцвярджае, што насамрэч ніякіх позваў яму не прыходзіла.

На наступны дзень, 8 чэрвеня, супрацоўнік КДБ на серабрыстай машыне ізноў “дзяжурыў” ля дома Рамановічаў. А сёння на гарадскім рынку ён у прысутнасці двух міліцыянтаў уручыў Алесю позву.

- Калі б мяне хацелі прыцягнуць да адказнасці па адміністратыўнай справе, то прычым тут КДБ, я не разумею ў такім выпадку, - здзіўляецца А.Рамановіч. - І са словаў камітэтчыка атрымліваецца, што я не з’яўляўся па позвах, таму яны і прыязджалі да мяне. Але гэта поўная бязглуздзіцца, бо КДБ не займаецца адміністратыўнымі справамі.   

Алесь Рамановіч сказаў, што сёння намераны з’явіцца па позве да ўчастковага інспектара Русіна.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international