Папраўкі ў закон «Аб супрацьдзеянні экстрэмізму» прайшлі другое чытанне

На паседжанні 13 чэрвеня Палата прадстаўнікоў у другім чытанні прыняла законапраект па пытанні ўзмацнення барацьбы з прапагандай нацызму і экстрэмізму.

У ім прадугледжана крымінальная адказнасць за рэабілітацыю нацызму, а таксама адміністрацыйная - за захоўванне або набыццё ў мэтах распаўсюджвання нацысцкай, экстрэмісцкай і тэрарыстычнай сімволікі і атрыбутыкі, паведамляе TUT.BY.

Законапраект прадугледжвае ўнясенне дапаўненняў у арт. 130 Крымінальнага кодэксу Беларусі. У назву артыкула «Распальванне расавай, нацыянальнай ці рэлігійнай варожасці ці розні» будзе ўнесена таксама «рэабілітацыя нацызму».

Да пяці гадоў пазбаўлення волі будзе пагражаць не толькі за «наўмысныя дзеянні, накіраваныя на ўзбуджэнне расавай, нацыянальнай, рэлігійнай варожасці або розні, на прыніжэнне нацыянальнага гонару і годнасці», але і за «наўмысныя дзеянні па рэабілітацыі нацызму».

У арт. 17.10 Кодэкса аб адміністрацыйных правапарушэннях нароўні з "прапагандай, публічнай дэманстрацыяй, вырабам і распаўсюджваннем нацысцкай сімволікі або атрыбутыкі" будзе ўведзеная адказнасць і за тыя ж дзеянні з сімволікай або атрыбутыкай «экстрэмісцкіх і тэрарыстычных арганізацый». Акрамя таго, прадугледжана пакаранне і за захоўванне або набыццё ў мэтах распаўсюджвання такой сімволікі і атрыбутыкі.

Таксама ўводзіцца адказнасць за рэцыдыў - у выпадку, калі такія ж дзеянні былі здзейсненыя паўторна на працягу аднаго года пасля накладання адміністрацыйнага спагнання.

Як і раней, не будуць з'яўляцца парушэннямі выраб, публічнае дэманстраванне або распаўсюд сімволікі або атрыбутыкі пры ажыццяўленні дзейнасці ў галіне тэатральнага, музычнага, цыркавога і выяўленчага мастацтва, бібліятэчнай справы, кінематаграфіі, музейнай справы, гастрольна-канцэртнай дзейнасці, выдавецкай справы, адукацыйнай дзейнасці, СМІ ў адпаведнасці з заканадаўствам.

Навіны ад Spring96.org у Telegram. Падпішыся на наш канал https://t.me/viasna96