Магілёўскі актывіст Раман Мішчанка атрымаў 15 сутак за мітынг, якога не было
Магілёўскі актывіст Раман Мішчанка. Фота mspring.online.
Суддзя суда Ленінскага раёна Магілёва Аксана Ратнікава пачала судзіць яго падчас абедзеннага перапынку, з-за чаго журналісты, праваабаронцы і маці не змаглі трапіць на працэс.
Па інфармацыі mspring.online, Рамана Мішчанку 3 траўня выклікалі позвай у Ленінскі РАУС для складання пратаколу за прызыў грамадзян у сацсетках прыйсці на несанкцыянаваную акцыю пратэсту 1 траўня. Нагадаем, што акцыя пратэсту 1 траўня не адбылася, паколькі раніцай гэтага ж дня супрацоўнікі МУС прэвентыўна затрымалі актывіста.
Пасля складання пратаколу маёрам Яўгенам Слаўнікавым актывіста на грамадзянскім “Опелі” даставілі ў суд Ленінскага раёна, прычым максімальна незаўважна для журналістаў, якія дзяжурылі на месцы. Нягледзячы на гэта, яны паспелі заўважыць, як Мішчанка заводзяць у будынак падчас абедзеннага перапынку. Пазней высветлілася, што суддзя Аксана Ратнікава пачала працэс да афіцыйнага адкрыцця суда з перапынку на абед. З-за гэтага працэс атрымаўся фактычным закрытым.
– Ніякага права пачынаць працэс у абедзенны перапынак у суддзі не было. Мы ўжо аформілі заўвагу ў кнізе скаргаў, – паведаміў праваабаронца Барыс Бухель.
Праваабаронцы, журналісты і маці Рамана Мішчанка змаглі ўбачыць яго толькі тады, калі суддзя абвясціла перапынак для вынясення рашэння. Актывіст змог сцісла распавесці пра затрыманне і суд для нашага відэасюжэту:
Суддзя Аксана Ратнікава пастанавіла арыштаваць Мішчанку на 15 сутак. Ён сваю віну не прызнаў, заявіўшы, што Канстытуцыя Рэспублікі Беларусь гарантуе свабоду сходаў.
– Ганьба такому суду,- коратка адкаментаваў актывіст рашэнне суддзі. Перш, чым яго павезлі ў магілёўскі ІЧУ, ён з праваабаронцам Барысам Бухелем падаў скаргу на пастанову суддзі. Вызвалены Мішчанка будзе ў 12 гадзін дня 18 траўня.
