Уладзімір Яроменак: пасля двух тэрмінаў на Акрэсціна – арышт у “амерыканцы”

Як стала вядома позна ўвечары 27 студзеня, маладафронтавец Уладзімір Яроменак, які днём раней не выйшаў з ізалятара на Акрэсціна пасля адбыцця  7-сутачнага арышту, падазраецца ва ўдзеле ў масавых беспарадках. Ён находзіцца зараз у СІЗА КДБ.

Як ужо паведамлялася, У.Яроменак паспеў адбыць пасля выбараў-2010 ужо два адміністратыўныя арышты. Першым было яго зняволенне на 15 сутак пасля акцыі салідарнасці 20 снежня. Другі раз маладафронтаўца арыштавалі пасля допыту ў КДБ у якасці сведкі па справе аб масавых беспарадках. Тады малады чалавек таксама знік, і на працягу сутак не было вядома, дзе ён знаходзіцца. І вось, калі сябры сабраліся сустракаць яго з Акрэсціна, ён знік на цэлыя суткі паўторна – каб знайсціся ўжо ў “амерыканцы”.

На працягу дня чакаецца допыт У.Яроменка з удзелам яго адваката.