Анатоль Лябедзька дагэтуль не атрымлівае лістоў ад жонкі і сына
26 студзеня родныя старшыні Аб’яднанай грамадзянскай партыі Анатоля Лябедзькі атрымалі другі ліст за-за кратаў. Як пазначана на канверце, ён быў адпраўлены ўчора, 25 студзеня.
“У мяне ўсе нармальна, - піша Анатоль Лябедзька. - Здаровы! Чытаю Булгакава, Маркеса. Што дытычыць будучынi, то вы ведаеце, што я аптымiст. Быў iм i застаюся. Не навiна для вас, што з адвакатам камунiкацыi няма з мiнулага года. Усiм мае найлепшыя i шчырыя прывiтаннi. Кожны дзень у супе лаўровы лiсток, гэта значыць, пра мяне памятаюць!”
Як распавёў нам сын палітзняволенага Арцём Лябедзька, у лісце бацька таксама адзначае, што перадачы атрымлівае, піша, што турбуецца за здороў’е бацькоў, а таксама просіць перадаць цёплыя рэчы.
“Наогул настрой ліста даволі аптымістычны, наколькі гэта можа быць у такой сітуацыі, - кажа Арцём. - Адзінае, што засмучае, гэта тое, што нашыя лісты ён па-ранейшаму не атрымлівае”.
