"Наша салідарнасць з вамі непарушная". Сімвалічная "хросная" даслала ліст падтрымкі Марфе Рабковай
Намесніца кіраўніка парламенцкай групы “Альянс 90/Зялёныя” ў нямецкім Бундэстагу Агнешка Бругер
Дэпутатка нямецкага Бундэстагу Агнешка Бругер, якая ў межах кампаніі #WeStandByYou з'яўляецца сімвалічнай "хроснай" Марфы Рабковай, даслала ліст падтрымкі праваабаронцы пасля разгляду яе апеляцыйнай скаргі ў Вярхоўным судзе.
"Дарагая Марфа Рабкова!
Дзякуючы вашай мужнай і непахіснай адданасці правам чалавека, дэмакратыі і свабодзе, вы застаецеся неверагодна выдатным прыкладам для пераймання для мяне і многіх людзей ва ўсім свеце. Наша салідарнасць з вамі непарушная, і я запэўніваю вас, што мы працягваем думаць пра вас, звяртаць увагу на вашу сітуацыю і выступаць на вашым баку да таго часу, пакуль вы і вашыя паплечнікі нарэшце не атрымаеце справядлівасць і свабоду.
Таму з вялікі жахам я сачыла за здзяйсненнем чарговай несправядлівасці ў вашай справе. Гэта скандал, што ваша абскарджанне было адхілена і вас абрабавалі на амаль 15 гадоў свабоды ў прамым сэнсе гэтага слова. Зычу вам шмат сіл для наступных крокаў і на працягу таго часу, пакуль вы зноў зможаце жыць на волі.
Беларускаму грамадству патрэбны такія моцныя галасы, як вы, каб імкненне да міру і справядлівасці нарэшце стала рэальнасцю для ўсіх людзей у Беларусі".
Агнешка Бругер таксама адзначыла, што была вельмі радая прысуджэнню Нобелеўскай прэміі міру заснавальніку ПЦ "Вясна" Алесю Бяляцкаму. На яе думку, прэмія — гэта ўзнагарода ўсёй грамадзянскай супольнасці Беларусі, у тым ліку і Марфе Рабковай за яе "важную працу для "Вясны" і вялікія заслугі перад народам Беларусі". Дэпутатка падкрэсліла, што яна разам са сваімі калегамі працягвае працаваць, каб аказваць ціск і прыцягваць увагу да сітуацыі ў Беларусі, у тым ліку выступае за адхіленне Беларусі ад удзелу ў чэмпіянаце Еўропы па футболе ў 2024 годзе.
"І я вельмі жадаю, каб тое бачанне, якое вы таксама падрабязна апісалі ў сваёй прамове ў судовай зале, стала рэчаіснасцю, і я, разам з нашым міністрам замежных спраў Аналенай Бэрбок і многімі паплечнікамі па ўсёй Еўропе, зраблю ўсё магчымае, каб застаючыся на вашым баку, мы дасягнулі нашых агульных мэтаў.
Вам, вашым родным, сябрам і паплечнікам я зычу нязломнай мужнасці, моцнага здароўя і сіл. Але больш за ўсё вы, нарэшце, заслугоўваеце свабоды і справядлівасці".
Падтрымай Марфу паштоўкай, тэлеграмай ці лістом салідарнасці па адрасе:ПК-4, вул. Антошкіна, 3 Марыі Аляксандраўне Рабковай |
Нагадаем, каардынатарка Валанцёрскай службы "Вясны" Марфа Рабкова была затрыманая вечарам 17 верасня 2020 года і дастаўленая ў ГУБАЗіК. 6 верасня 2022 года палітзняволеную Марфу Рабкову асудзілі да 15 гадоў зняволення па 10 артыкулах Крымінальнага кодэкса за падзеі 2016-2020 гадоў.
28 лютага 2023 г. у Вярхоўным судзе ў закрытым рэжыме адбыўся разгляд апеляцыйнай скаргі на прысуд. Тэрмін зняволення для Марфы быў скарочаны на тры месяцы. Такім чынам, канчатковы Рабковай прызначана — 14 гадоў і 9 месяцаў калоніі ва ўмовах агульнага рэжыму, а таксама 700 базавых велічынь штрафу. У сярэдзіне сакавіка 2023 г. Марфу этапавалі ў гомельскую ПК № 4.
"Ёй ужо трэба не проста УГД зрабіць, а пункцыйную біяпсію", — сукамерніца Марфы Рабковай пра яе здароўе
