Сайт "Брэсцкай Вясны" і т-г канал "Віцебскай Вясны" папоўнілі спіс экстрэмісцкіх матэрыялаў: хроніка пераследу 9-10 сакавіка Дапоўнена

У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 9-10 сакавіка збірае факты палітычнага пераследу беларусаў – інфармацыя ўвесь час дапаўняецца.

Сайт «Брэсцкай Вясны» і тэлеграм-канал «Віцебская Вясна» — чарговае папаўненне Спіса экстрэмісцкіх матэрыялаў

У яго трапілі: сайт «Берасцейская вясна». Ініцыятыва аб прызнанні сайта “экстрэмісцкім" зыходзіла ад намесніка пракурора Берасцейскай вобласці, а пастанову прымаў суддзя Андрэй Канючка.

Telegram-каналы і чаты «Віцебская Вясна», «STOP LUKA», «БелАЗ для Жизни», «Большевик, ябатьки-3%!», «Вялiкае Сцiклева», «Клецк для жизни!», «Ozercolife_New», «Фаниполь», «Копыль», «Чат Столбцы РАЗАМ», «Ратамка», «Старые Дороги».

Да палітзняволенай Паліны Шарэнды-Панасюк не пускаюць адваката

З канца снежня ад палітзняволенай няма навін. Як стала вядома берасцейскай „Вясне”, амаль увесь гэты час да яе намагаецца патрапіць адвакат — але ж яго не пускаюць. Таксама не прымаюць пасылкі: маці Паліны атрымала адпіску з калоніі, але ж і пасля яе ні рэчавую, ні прадуктовую перадачку не прынялі.

Акрамя ўсяго гэтага пасля новага года палітзняволеная правяла 50 содняў у ШІЗА.

Нагадаем, супраць Паліны Шарэнды-Панасюк зноў узбудзілі крымінальную справу паводле арт. 411 КК, па якім яе летась ужо асудзілі: да 2 гадоў далалі зняволення яшчэ адзін год. У кастрычніку Паліну змясцілі  на паўгода ў ПКТ, дзе рэгулярна змяшчаюць у ШІЗА. Суткі там не ўлічваюцца ў тэрмін ПКТ.

Стрыечнаму брату намесніка камандзіра палка Каліноўскага дадалі яшчэ тры артыкулы

Праваабаронцам стала вядома, што справу палітзняволенага жыхара Бабруйска Сяргея Франчука  перадалі ў пракуратуру для накіравання ў суд.

Калі раней Сяргею інкрымінавалі толькі «народны» арт. 342 КК (арганізацыя або актыўны ўдзел у групавых дзеяннях, якія груба парушаюць грамадскі парадак), то цяпер яго абвінавачваюць ажно па чатырох артыкулаў — яму дадалі арт. 368 КК (абраза Лукашэнкі), арт. 369 (абраза прадстаўніка ўлады), арт. 130 (распальванне варожасці).

Нагадаем, стрыечнага брата намесніка камандзіра палка Каліноўскага Вадзіма Кабанчука затрымалі ў жніўні. Ёсць інфармацыя, што падчас затрымання Сяргея моцна збілі — на «пакаяльным відэа» ён стаіць з залепленым ілбом.

У доме бацькоў былога палітвязня Аляксандра Кабанава адбыўся ператрус

Пра гэта блогер Кабанаў напісаў у сваім Facebook.

Кабанаў быў асуджаны  на тры гады пазбаўлення волі. 17 снежня Аляксандр выйшаў на волю, цалкам адбыўшы тэрмін — пасля гэтага экс-палітвязень з'ехаў з краіны.

Супраць віцебскага праваабаронцы Паўла Левінава распачалі крымінальную справу

Вядома, што Левінаў прызнаны падазраваным па ч. 2 арт. 342 КК (Навучанне або іншая падрыхтоўка асоб для ўдзелу ў групавых дзеяннях, якія груба парушаюць грамадскі парадак, а таксама фінансаванне або іншае матэрыяльнае забеспячэнне такой дзейнасці пры адсутнасці прыкмет больш цяжкага злачынства).

Адзначым, што праваабаронца знаходзіцца за мяжой, аднак следчыя просяць яго прыйсці ва УСК для допыту.

У Гродна затрыманы Павел Якубель

У Гродне ГУБАЗіК затрымаў Паўла Якубеля — яго пляменніца Карына Маліноўская пасля збіцця сілавікамі ў 2020-ым годзе страціла дзіця.

Праўладныя тэлеграм-каналы паведамляюць пра затрыманне жыхара Гродна Паўла Якубеля. На «пакаяльным відэа» мужчына кажа, што затрыманы за рэгістрацыю ў плане «Перамога» і за тое, што знаходзіцца ў пратэсных чатах у Facebook і Telegram.

На відэа Павел таксама расказаў, што яго пляменніца — актывістка Карына Маліноўская. Дзяўчына распавядала, што пасля збіцця сілавікамі ў 2020-ым годзе страціла дзіця. Пазней яна з'ехала за мяжу. Сілавікі пішуць, што там яна «праходзіла падрыхтоўку ў BYPOL».

Па інфармацыі @Grodno_grab, у лютым затрымалі цётку Карыны — Ірыну Савашынскую.

У «Спіс экстрэмістаў» дадалі яшчэ 28 чалавек — цяпер у ім 2531 чалавек

10 сакавіка МУС чарговы раз абнавіла «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Акрамя іншых, у спіс дадалі сацыяльную актывісту Анастасію Кухту, 20-гадовага Андрэя Раптуновіча, валанцёра фонду «Страна для жизни» Антона Сташэўскага, рэйкавага партызана Віталя Мельніка, фігурантаў «справы АГСБ» Дзмітрыя Сасноўскага, Аляксея Глотава, Наталлю Мацвееву, Вадзіма Гулевіча, Кірыла Ашурка.

Затрыманы жыхар Ваўкавыска

У тэлеграм-канале дзяржаўнага інфармагенцтва з’явіўся ролік з арыштаваным жыхаром Ваўкавыска. Раней такія відэа з'яўляліся толькі ў тэлеграм-каналах прапагандыстаў і сілавікоў.

Затрыманага завуць Зміцер Марозаў, БелТА ў сваім пасце называе яго актыўным удзельнікам пратэстаў. Паводле канала, мужчына цяпер знаходзіцца пад вартай, яму інкрымінуецца ўхіленне ад сплаты падаткаў і гвалт або пагроза прымянення гвалту ў дачыненні да супрацоўніка органа ўнутраных спраў, піша "Наша Ніва".
Інфармацыя дапаўняецца.