Краязнаўца Ігара Хмару асудзілі на 2,5 гады "хатняй хіміі" за ўдзел у пратэстах

У судзе Маскоўскага раёна Мінска 11 лістапада асудзілі палітзняволенага Ігара Хмару паводле ч. 1 арт. 342  (Актыўны ўдзел у дзеяннях, якія груба парушаюць грамадскі парадак) Крымінальнага кодэкса. Справу разглядала суддзя Таццяна Пірожнікава.

Краязнаўцу і журналіста Ігара Хмару затрымалі 2 жніўня 2022 года, калі ён праводзіў экскурсію па Мінску. Ад чалавека, які быў за кратамі разам з Ігарам, стала вядома, што затрымалі Хмару за размову на беларускай мове на вуліцы.

Як паведаміла, "Медыязона", Ігар прызнаў віну і сказаў, што раскайваецца ў сваіх дзеяннях і "змяніў жыццёвыя прыярытэты". 

11 лістапада суддзя Маскоўскага суда Мінска Таццяна Пірожнікава прызнала Ігара Хмару вінаватым паводле ч. 1 арт. 342  (Актыўны ўдзел у дзеяннях, якія груба парушаюць грамадскі парадак) Крымінальнага кодэкса і прысудзіла яму пакаранне тэрмінам 2 гады і 6 месяцаў абмежавання волі без накіравання ў папраўчую ўстанову адкрытага тыпу ("хатняя хімія"). 

Ігара вызвалілі ў зале суда.