Распачата 9 крымінальных спраў, звязаных з правядзеннем рэферэндуму: каго затрымалі?

2022 2022-02-21T08:41:19+0300 2022-02-21T09:07:04+0300 be https://spring96.org/files/images/sources/listy-referendum-2.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Скрыншот з відэа КДБ

Скрыншот з відэа КДБ

У КДБ Беларусі 20 лютага паведамілі аб затрыманні ўдзельнікаў груп, якія планавалі «зрыў рэферэндуму па зменах і дапаўненнях у Канстытуцыю». Супрацьпраўныя дзеянні гэтых людзей заключаліся ў рассылцы лістоў з заклікам да сябраў выбарчых камісій "лічыць галасы сумленна".

Увечары ў эфіры праграмы “Контуры” на АНТ быў паказаны сюжэт з затрыманымі па гэтай справе. Усім ім можа пагражаць да пяці гадоў калоніі па  ч.2 арт. 191 Крымінальнага кодэкса (Перашкода ажыццяўленню выбарчых правоў, права на ўдзел у рэферэндуме, альбо рэалізацыі права заканадаўчай ініцыятывы грамадзян, альбо рабоце Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў, выбарчых камісій, камісій па рэферэндуме, камісій па правядзенні галасавання аб адкліканні дэпутата).

А яшчэ раней МУС паведаміў аб тым, што ў Беларусі распачалі дзевяць крымінальных спраў, звязаных з правядзеннем рэспубліканскага рэферэндуму.

Начальнік Галоўнага ўпраўлення аховы правапарадку і прафілактыкі міліцыі грамадскай бяспекі МУС Аляксандр Купчэня паведаміў на прэс-канферэнцыі, што у Беларусі распачалі дзевяць крымінальных спраў, звязаных з маючым адбыцца канстытуцыйным рэферэндумам, прызначаным на 27 лютага.

У КДБ пацвердзілі інфармацыю пра затрыманне ўдзельнікаў груп, якія «планавалі зрыў рэферэндуму»

Следчымі органамі распачата 9 крымінальных спраў, у тым ліку за перашкоду праву на ўдзел у рэферэндуме, незаконныя дзеянне ў дачыненні да інфармацыі аб персанальных звестках, паклёп і псаванне маёмасці

Журналісты паспрабавалі правесці расследванне і знайсці нейкую дадатковую інфармацыю пра гэтых людзей.

А што вядома праваабаронцам пра тых, якія нібыта рассылалі лісты, у якіх заклікалі сябраў выбарчых камісій "лічыць галасы сумленна"?

Праўда ў відэасюжэце гучаць прозвішчы ня ўсіх затрыманых па справе, некаторыя асобы не называюцца. Тым не меней…

Адзін з затрыманых – Вячаслаў Дашкевіч, жыхар Мінска. Затрымліваўся яшчэ ў 2010 годзе падчас грубага разгону мірнай акцыі ў сталіцы. Быў арыштаваны на 15 сутак, потым у 2013 годзе яго затрымалі каля Савецкага РУУСа Мінска, дзе ён маніторыў затрыманні ў ходзе "Чарнобыльскага Шляху".  Тады яму суд прысудзіў 5 сутак арышту.

Наступны – Міхаіл Хаміцэвіч, названы як уладальнік фірмы. Вядома, што Міхаіла затрымлівалі ў Мінску 8 лістапада 2020 года. Ён атрымаў 15 сутак за парушэнне парадку арганізацыі і правядзення масавых мерапрыемстваў па ч.1 арт 24.23 КаАП.

З відэа вынікае, што сярод затрыманых - двое супрацоўнікаў ягонай фірмы. Аднаго з іх паказваюць са спіны.

Пра Рамана Карпука ў сюжэце паведамілі, што ён з’яўляецца студэнтам 1 курсу з Берасця. Вядома таксама, што юнака затрымлівалі 20 верасня 2020 года. Некалькі сутак ён правёў у Жодзінскім ІЧУ і ў выніку быў пакараны штрафам.

Пра ягоную маці, паказаную ў сюжэце, пакуль нічога невядома.

Яшчэ пра адну з персанажаў сюжэту дзяржаўных прапагандыстаў Таццяну Заяц было паведамлена, што яна неаднаразова затрымлівалася за ўдзел у пратэстных акцыях.

Праваабаронцам вядома пра затрыманні Заяц ў Мінску 6 і 13 верасня 2020 года.  Яна атрымлівала штрафы па артыкуле 24.23 КаАП (парушэнне парадку арганізацыі і правядзення масавых мерапрыемстваў).

Пра Мікалая Карабко, якога па інфармацыі КДБ затрымалі пры перасячэнні польскай мяжы, вядома, што ён нібыта працуе таксістам. Па звестках праваабаронцаў, затрымліваўся 9 жніўня 2020 года.

Кацярыну Купрыянаву называюць супрацоўніцай банка, у якой знайшлі лісты, адрасаваныя суддзям. Пра яе пакуль нічога невядома.

Апошнія навіны

Партнёрства

Сяброўства