Палітзняволенага эколага з Мядзеля асудзілі да 4 гадоў калоніі
Суд Мядзельскага раёна агучыў прысуд 48-гадоваму эколагу Станіславу Таспаеву — чатыры гады пазбаўлення волі ў калоніі ва ўмовах агульнага рэжыму, а таксама штраф памерам 200 базавых велічыняў (8 000 рублёў). Яго прызналі вінаватым у "дыскрэдытацыі Беларусі" (арт. 369-1 Крымінальнага кодэкса) і "неаднаразовым парушэнні парадку арганізацыі або правядзення масавых мерапрыемстваў" (арт. 342-2 Крымінальнага кодэкса). Справу разглядаў суддзя Аляксандр Шутко. У 2021 годзе Станіслаў ужо быў асуджаны да "хатняй хіміі" па палітычных матывах. Вядома, што Станіслаў мае інваліднасць — раней у яго быў дыягнаставана анкалогія, але апошнім часам у мужчыны была рэмісія.
У чым абвінавацілі палітвязня
Як паведаміла прэс-служба пракуратуры, Станіслаў з'яўляецца адміністратарам YouTube-канала «Инициатива Курорта Нарочь» (прызнаны экстрэмісцкім 12 чэрвеня 2024 года), у якім "з сакавіка 2017 года па ліпень 2024 года ў 36 паведамленнях на відэазапісах ён распаўсюдзіў загадзя ілжывыя звесткі аб палітычным, эканамічным і сацыяльным становішчы Рэспублікі Беларусь, прававым становішчы яе грамадзян, дзейнасці дзяржаўных органаў, якія дыскрэдытуюць краіну перад неабмежаваным колам асобаў".
Акрамя таго, паведамляецца, што палітвязня прыцягвалі да адміністрацыйнай адказнасці паводле арт. 24.23 КаАП (несанкцыянаванае пікетаванне) тройчы за год — траўні, чэрвені і ліпені 2024 года. Прычынай сталі публікацыі відэа з выявай сімволікі ў бела-чырвона-белых колерах. Гэта стала падставай для абвінавачвання паводле арт. 342-2 КК.
Адзначым, што за "неаднаразовае парушэнне парадку арганізацыі або правядзення масавых мерапрыемстваў" у Беларусі асудзілі толькі чатырох чалавек — Аляксандра Кутаса, Андрэя Кунцэвіча, Уладзіміра Булаўскага і Мікалая Машарскага.
Што вядома пра Станіслава
Паводле "Нашай Нівы", калі Станіслаў быў малы, сям'я пераехала за 7000 кіламетраў ад Беларусі. Яны перасяліліся ў сяло Малакурыльскае на востраве Шыкатан, якія ўваходзіць у шэраг Курыльскіх астравоў. Там знаходзіўся найбуйнейшы ў СССР рыбаперапрацоўчы камбінат. Станіслаў пражыў там 15 гадоў і скончыў школу.
Пасля Таспаеў вярнуўся ў Беларусь. У сярэдзіне 1990-х ён адкрыў ІП у Мядзельскім раёне. Мужчына захапляецца фатаграфіяй, і гэта была адна з крыніцаў яго даходу. Зарабляе і камп'ютарнымі паслугамі. Мяркуючы па сацсетках, яшчэ падпрацоўваў рабочым — напрыклад, у 2023 годзе мантаваў рэкламу на білборды. Акрамя працы, Станіслаў займаўся экалагічнымі праблемамі Мядзеля і ваколіцаў, абараняў прыроду.
У сацсетках ён расказваў пра Мядзельшчыну, а ў 2014-м даў вялікае інтэрв'ю Анлайнеру, правёўшы журналістаў сцежкамі горада і ваколіцаў. Таксама Станіслаў быў раённым каардынатарам праекта "IT-краіна", які фінансавала ІТ-кампанія "Белхард".
