Справа Юрыя Прахарэнкі: вырашаецца пытанне аб накіраванні яго на псіхіятрычнае лячэнне
Ілюстрацыйнае фота
Суд Савецкага раёна Гомеля 29 кастрычніка працягнуў разгляд крымінальнай справы ў дачыненні да Юрыя Прахарэнкі, якога вінавацяць адразу па трох артыкулах Крымінальнага кодэксу: арт. 369 (абраза прадстаўніка ўлады), арт. 391 (абраза суддзі або народнага заседацеля) і арт. 368 (абраза прэзідэнта Рэспублікі Беларусь).
Па справе праходзяць 23 пацярпелыя. Гэта супрацоўнікі органаў унутраных спраў, суддзі, пракурорскія работнікі і нават прэзідэнт.
Справу разглядае суддзя Аляксандр Мохараў.
Сам абвінавачаны ў судзе па-ранейшаму не прысутнічае, сваякі кажуць, што малады чалавек знаходзіцца ў дэпрэсіўным стане, у яго заўважаныя панічныя атакі і псіхасаматычныя парушэнні. Яму трэба неадкладнае медычнае даследаванне и лячэнне, аднак гэтае пытанне так хутка не вырашаецца.
За час зняволення ў СІЗА Гомеля Юрый пахудзеў больш чым на 35 кілаграмаў.
Ягоным законным прадстаўніком у судзе выступае бацька — Сяргей Прахарэнка.
Суд над Прахарэнкам па-ранейшаму праходзіць без яго ўдзелу, многія пацярпелыя ігнаруюць працэс
Сёння на судовым пасяджэнні былі даследаваныя 5, 6, 7 тамы крымінальнай справы. Абвешчаныя вынікі экспертыз па розных каментарах, на прыналежнасць іх да нарматыўных або ненарматыўных форм маўленчага выказвання.
У трох выпадках з васьмі, даследаваных ў гэтых тамах, форма маўленчага выказвання экспертызай была прызнана нарматыўнай.
У сувязі з гэтым, у спрэчках, адвакат звярнула ўвагу, што некаторыя эпізоды са справы неабходна выключыць, таму што яны не нясуць складу злачынства.
У сёмым томе зачытваліся розныя характарыстыкі на Юрыя: са школы, навучальнай установы, працы і з СІЗА, у асноўным - станоўчыя.
Гэтак жа былі прадастаўлены дадзеныя білінгу МТС па карыстанні тэлефонам і інтэрнэтам.
У спрэчках пракурор, у сувязі з вынікамі псіхіятрычнай камісіі, прапанаваў накіраваць Прахарэнка на лячэнне ў псіхіятрычную бальніцу на агульных падставах. Адвакат з гэтым пагадзілася. Бацька, які выступае законным прадстаўніком сына, папрасіў прабачэння ў пацярпелых, і прасіў справядлівага пакарання па законе.
У панядзелак 1.11.2021 ў 9.00 будзе абвешчана рашэнне суда.
