29 гадоў калоніі на ўсіх. Вынесеныя прысуды яшчэ васьмі фігурантам справы аб масавых беспарадках у Брэсце
У судзе Ленінскага раёна Брэста 12 ліпеня быў вынесены прысуд па крымінальнай справе па ч. 2 арт. 293 Крымінальнага кодэксу (Удзел у масавых беспарадках) супраць 12 чалавек. Гэта жо чацвёртая партыя берасцейцаў, якіх судзяць па справе аб масавых беспарадках, узбуджанай пасля пратэстаў, якія прайшлі ў Брэсце 9 і 10 жніўня мінулага года.
- Перад абвяшчэннем прысуда. Фота "Брэсцкай Вясны"
Суддзя Дзмітрый Шурын вынес прысуды васьмі фігурантам справы. Справа Антонава Марка, Пекача Яўгена і Аляксандра Цімафеева вынесена ў асобную вытворчасць па прычыне іх хваробы. Яшчэ адзін фігурант справы - Алег Юраў, які не быў заключаны пад варту, абвешчаны ў вышук.
Прызначаны наступныя тэрміны васьмі фігурантам справы:
- палітвязень Герасімук Святаслаў — 4 гады і 6 месяцаў калоніі ўзмоцненага рэжыму;
- палітвязень Збаранскі Давід — 3 гады калоніі агульнага рэжыму;
- палітвязень Мельнічук Валерый — 4 гады і 6 месяцаў калоніі ўзмоцненага рэжыму;
- палітвязень Сірадзэ Марэк — 4 гады калоніі ўзмоцненага рэжыму;
- Тарасавец Андрэй — 3 гады калоніі агульнага рэжыму (узяты пад варту ў зале суда);
- палітвязень Трафімук Вячаслаў — 4 гады калоніі ўзмоцненага рэжыму;
- непаўналетні Пацяйчук Іван — 3 гады выхаваўчай калоніі (узяты пад варту ў зале суда);
- непаўналетні Імхавік Максім — 3 гады выхаваўчай калоніі (узяты пад варту ў зале суда).
У чым іх абвінавацілі?
Паводле версіі следства, падчас акцыі пратэсту ў цэнтры Брэста абвінавачаныя груба парушылі грамадскі парадак, учынілі пагромы, нанеслі супрацоўнікам міліцыі ўдары рукамі і нагамі, рознымі прадметамі. У ход ішлі дошкі, палкі, вулічныя скрыні для смецця, фрагменты лавак, тратуарнай пліткі і асфальту, бутэлькі, камяні, металічныя балты, ёмістасці з фарбай, піратэхнічныя вырабы.
У выніку беспарадкаў, па версіі следства, пацярпелі 24 сілавіка. З іх пацярпелымі па справе прызнаныя 19 чалавек. Адзін супрацоўнік атрымаў дзве раны ў галіне вялікага пальца правай пэндзля, якія адносяцца да катэгорыі лёгкіх цялесных пашкоджанняў. У астатніх —пабоі. Акрамя таго, абвінавачаныя спрабавалі ўжыць гвалт і прычыніць цялесныя пашкоджанні яшчэ траім сілавікам, заявіў у судзе дзяржабвінаваўца.
Усяго ж па справе агульная сума нанесенай, па версіі следства, шкоды — каля 24 тысяч рублёў: пашкоджаныя 13 аўтамабіляў міліцыі, адзін аўтобус, шчыты, шлемы, бронекамізэлькі, асфальт, тратуарная плітка, лаўкі, урны, дрэвы.
У Брэсце пачалі судзіць чацвёртую партыю абвінавачаных у масавых беспарадках
