Палітвязень Алег Мазгоў выйшаў на волю
"Вясне" стала вядома, што пасля трох месяцаў зняволення ўвечары першага снежня з-пад варты вызвалілі палітвязня Алега Мазгова, фігуранта справы па артыкуле 293 Крымінальнага кодэкса ("Масавыя беспарадкі").
Мазгоў застаецца абвінавачаным па крымінальнай справе. Яму абраная мера стрымання ў выглядзе падпіскі аб нявыездзе.
25-гадовы спартсмен Алег Мазгоў да затрымання працаваў у Мінску фітнес-трэнерам, займаўся боксам. Да арышту Алег уладкаваўся на другую працу грузчыкам, каб зрабіць дома рамонт і падрыхтавацца да нараджэння дзіцяці. Быў затрыманы першага верасня за ўдзел у мітынгу дзявятага жніўня. Утрымліваўся пад вартай у СІЗА-1 на Валадарскага.
Пастаяў у счэпцы – крымінальная справа
17 верасня беларуская праваабарончая супольнасць прызнала Алега Мазгова палітвязням. Праваабаронцы лічаць яго абвінавачванне па артыкуле 293 Крымінальнага кодэкса ("Масавыя беспарадкі") палітычна матываваным пераследам у сувязі з рэалізацыяй ім свабоды мірных сходаў і выказвання свайго меркавання адносна абвешчаных вынікаў выбараў Прэзідэнта Рэспублікі Беларусь. Дзесяць праваабарончых арганізацый Беларусі запатрабавалі ад уладаў неадкладнага вызвалення з-пад варты палітвязня Алега Мазгова і спыніць крымінальны пераслед у дачыненні да яго.
