Тры гады калоніі агульнага рэжыму: у Гомелі асудзілі Сяргея Яфімава

У Гомелі за гвалт у дачыненні да міліцыянтаў (арт. 364 КК) на тры гады калоніі агульнага рэжыму асудзілі 29-гадовага гамельчука Сяргея Яфімава, паведамляе TUT. BY.

Паводле звестак следства, У Гомелі ўвечары 9 жніўня ў раёне сквера Кірылы Тураўскага мужчына падбег да супрацоўніка АМАПа, распыліў пярцовы газ яму ў твар з газавага балончыка і ўдарыў яго ў галаву. Прычым перад гэтым, па словах праваахоўнікаў, супрацоўнік міліцыі ні словам, ні дзеяннямі не выяўляў намераў затрымаць мужчыну. На дапамогу міліцыянту падбеглі двое калег і спрабавалі затрымаць нападніка, той спрабаваў вырвацца, распыляў газ і нанёс аднаму з супрацоўнікаў "не менш за дзевяць удараў у вобласць галавы і тулава". Доказам у судзе з'явіліся паказанні пацярпелых міліцыянтаў, а таксама відэа, знятае камерамі відэаназірання на плошчы Леніна ў Гомелі.

Як падчас следства, так і ў судзе Сяргей цалкам прызнаў віну. Распавёў, што нападаць на міліцыянтаў у той вечар не збіраўся, але спалохаўся, што пачнуцца затрыманні, расхваляваўся, стаў уцякаць, а калі наткнуўся на амапаўцаў, дастаў балончык і распыліў. Пацярпелыя ў справе — два супрацоўнікі АМАПу і іх камандзір. Адзін з пацярпелых ацаніў нанесеную маральную шкоду ў 700 рублёў, другі — у 800, трэці заяўляць грашовую кампенсацыю не стаў.

Пракурор прасіў прысудзіць Сяргея Яфімава да трох гадоў калоніі агульнага рэжыму — такі прысуд суд у выніку і вынес.

Перад абвяшчэннем прысуду абвінавачваны выступіў з апошнім словам.

— Я прызнаю віну, прызнаю, што зрабіў памылку. Мог жыць без зняволення, працаваць і займацца сям'ёй. Разумею, што здзейсніў злачынства і павінен за гэта адказаць, але прашу не пазбаўляць мяне волі.