Хто будзе назіраць за прэзідэнцкімі выбарамі ў Беларусі? Звесткі ЦВК
На сайце Цэнтральнай камісіі па выбарах і правядзенню рэферэндумаў аднавіліся звесткі пра назіральнікаў, якія акрэдытаваныя выбарчымі камісіямі па стане на 29 чэрвеня.
Больш за ўсіх назіральнікаў за прэзідэнцкімі выбарамі вылучылі грамадскія аб’яднанні – 17 655 грамадзян, прычым большасць з іх акрэдытаваныя ва ўчастковых выбарчых камісіях – 16 902.
Традыцыйнымі лідэрамі выступаюць прафсаюзы, якія ўваходзяць у Федэрацыю прафсаюзаў Беларусі, БРСМ, аб’яднанне “Белая Русь”, Беларускі саюз жанчын і Беларускае грамадскае аб’яднанне ветэранаў.
На другім месцы па вылучэнні назіральнікаў – грамадзяне шляхам падачы заяў у выбарчыя камісіі. Такіх зарэгістравана 2814. Далей ідуць прадстаўнікі працоўных калектываў – 1312, і палітычныя партыі – 612.
Больш за ўсіх накіравалі назіральнікаў Камуністычная партыя Беларусі (478), Рэспубліканская партыя працы і справядлівасці (103), а таксама Сацыял-дэмакратычная партыя Народнай Згоды (21).
Меней за ўсіх назіральнікаў накіравалі Ліберальна-дэмакратычная партыя (2) і Партыя БНФ (1).
Агулам па краіне на прэзідэнцкіх выбарах акрэдытаваныя 22 393 нацыянальныя назіральнікі.
Акрэдытацыя назіральнікаў працягваецца.
