ГУУС назіральніку: Даручана правядзенне разбіральніцтва і прыняцце мераў да вінаватых службовых асобаў Дакумент

2020 2020-01-20T14:58:36+0300 2020-01-20T14:59:01+0300 be http://spring96.org/files/images/sources/alexej_lojka_1500.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Юрыст ПЦ "Вясна" Аляксей Лойка

Юрыст ПЦ "Вясна" Аляксей Лойка

Юрыст Праваабарончага цэнтра "Вясна" Аляксей Лойка абскардзіў рашэнне Фрунзенскага РУУС аб адмове ва ўзбуджэнні справы ў дачыненні да членаў выбарчай камісіі.

Нагадаем, Аляксей Лойка, як назіральнік кампаніі "Праваабаронцы за свабодныя выбары", хацеў 24 кастрычніка 2019 года папрысутнічаць на сустрэчы праўладнай кандыдаткі Марыны Лянчэўскай з працоўным калектывам сярэдняй школы №157 г. Мінска. Калі ён прыйшоў у школу, дырэктарка Святлана Скроцкая вырашыла, што яму не варта прысутнічаць на гэтай сустрэчы, і пачала выштурхоўваць назіральніка з хола. На дапамогу ёй прыйшоў настаўнік гісторыі, член участковай выбарчай камісіі Сяргей Юдзінец, які сілай выштурхнуў Аляксея Лойку са школы.

Праваабаронца па гэтым факце звярнуўся ў Фрунзенскі раённы аддзел Следчага камітэта аб узбуджэнні крымінальнай справы па факце неправамернага прымянення фізічнай сілы да яго з боку работнікаў школы.

26 лістапада 2019 г. з Фрунзенскага РУУС г. Мінска, куды СК пераслаў зварот, прыйшоў адказ: "у ходзе правядзення праверкі, парушэнняў дзейнага заканадаўства ўстаноўлена не было".

З такім адказам Аляксей Лойка не пагадзіўся і звярнуўся са скаргай у ГУУС Мінгарвыканкама, дзе ўказаў:

"Зыходзячы з адказу Фрунзенскага РУУС г.Мінска, нельга зрабіць выснову аб тым, ці былі апытаныя асобы, якія здзейснілі ў дачыненні да мяне супрацьпраўныя дзеянні – Скроцкі С. і Юдзінец С., ці вымаліся відэакамеры з хола школы і ці вывучалася іх змесціва, ці была прадпрынятая якая-небудзь спроба ўстанавіць аб'ектыўныя дадзеныя, якія сведчаць аб замаху з боку работнікаў школы на грамадскія адносіны з нагоды маёй асабістай недатыкальнасці і галоснасці выбарчага працэсу і даць ім належную прававую ацэнку".

Таксама назіральнік адзначае, што нельга зрабіць выснову і пра тое, ці былі апытаныя ў ходзе праверкі па яго скарзе сама кандыдатка Марына Лянчэўская і дзяжурныя на вахце, якія назіралі за сітуацыяй, што адбывалася. На падставе гэтага Аляксей Лойка зрабіў выснову, што праверка была праведзена няпоўна, павярхоўна і неаб'ектыўна. Прасіў  ГУУС прызнаць адказ Фрунзенскага РУУС незаконным, а дзеянні службовай асобы, якая яе праводзіла, непрафесійнымі і не адпавядаючымі патрабаванням эфектыўнага расследавання заявы аб здзяйсненні злачынства, прыняць рашэнне ў адпаведнасці з кампетэнцыяй ГУУС.

Упраўленне аховы правапарадку і прафілактыкі міліцыі грамадскай бяспекі ГУУС разгледзела зварот праваабаронцы і прыйшло да высновы, што з боку службовых асобаў Фрунзенскага РУУС выяўлены шэраг недахопаў у частцы паўнаты і ўсебаковага разгляду названага звароту.

"У сувязі з гэтым, кіраўніцтву ААПП МГБ РУУС дадзена даручэнне аб правядзенні разбору з наступным прыняццем мераў рэагавання да вінаватых службовых асобаў і належным разглядзе довадаў, выкладзеных у звароце", – падкрэсліў у адказе начальнік УАПП і МГБ ГУУС Мінгарвыканкама Аляксандр Купчэня.

ГУУС назіральніку: Даручана правядзенне разбіральніцтва і прыняцце мераў да вінаватых службовых асобаў

Апошнія навіны

Партнёрства

Сяброўства