Алесь Бяляцкі пра ператрусы ў офісах Tut.by і БелаПАН: Ідзе зачыстка інфармацыйнай прасторы

2018 2018-08-07T11:03:23+0300 2018-08-07T11:04:29+0300 be http://spring96.org/files/images/sources/bialiacki_tutby.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Алесь Бяляцкі. Фота: Tut.by

Алесь Бяляцкі. Фота: Tut.by

Старшыня Праваабарончага цэнтра “Вясна” Алесь Бяляцкі пракаментаваў сайту palitviazni.info сённяшнія ператрусы ў офісе самага папулярнага Інтэрнэт-партала Tut.by і інфармацыйнага агенцтва БелаПАН.

“Гэта мэтанакіраваная палітыка абмежавання інфармацыйнага поля ў Беларусі з тым, каб трымаць беларускіх грамадзян у атмасферы страху, няпэўнасці і дэзінфармацыі”, – адзначае праваабаронца.

Сёмага жніўня два паверхі офісаў партала Tut.by, размешчаных у БЦ Omega Tower, ачапілі супрацоўнікі спецслужбаў.

Затым з’явілася інфармацыя, што затрымана галоўны рэдактар партала Марына Золатава і рэдактар Ганна Калтыгіна, якіх абвінавачваюць у тым, што яны заходзілі на сайт дзяржаўнага агенцтва БелТА па старым паролі платнага доступу.

Аналагічныя прэтэнзіі сілавікоў ёсць да выдавецтва «Беларуская навука» і да інфармацыйнага агенцтва БелаПАН. У БелаПАНе затрыманая журналістка Таццяна Каравянкова.

“Усе гэтыя факты сведчаць пра адно: ідзе зачыстка інфармацыйнай прасторы, – кажа Алесь Бяляцкі. – Такія праявы ў краіне адбываюцца то больш востра, то менш востра, але ад іх улады не адступаліся ніколі. Гэты працэс ідзе фактычна ўсе апошнія 25 гадоў. Мы добра памятаем, як прэсавалі журналістаў і ў 90-я, і напачатку 2000-х. Незалежным СМІ рэгулярна ўстаўлялі палкі ў колы”.

Са слоў праваабаронцы, праз крымінальны пераслед улады спрабуюць абмяжоўваць права беларусаў на свабоду атрымання інфармацыі.

“Былі праблемы ў незалежных СМІ з падпіскай, распаўсюдам выданняў праз шапікі “Белсаюздрука”, – працягвае Алесь Бяляцкі. – Гэта такая мэтанакіраваная палітыка абмежавання інфармацыйнага поля ў Беларусі з тым, каб трымаць беларускіх грамадзян у атмасферы страху, няпэўнасці і дэзінфармацыі”.

Апошнія навіны

Партнёрства

Сяброўства