Суды за збор подпісаў працягваюцца. Эдуарду Пальчысу - 30 базавых! Дапоўнена
Эдуард Пальчыс.
Пасля дапрацоўкі пратакола па ч.3 арт. 23.34 КаАП Рэспублікі Беларусь блогера Эдуарда Пальчыса, які 21 лютага збіраў подпісы ў падтрымку беларускай мовы, судзілі
4 красавіка ў судзе Фрунзенскага раёна справу актывіста разглядзеў суддзя А.Скуратовіч. Актывіст быў належным чынам паведамлен смс-абвесткай, таму справа разглядалася без яго. Сведкам па справе выступіў супрацоўнік міліцыі Аляксандр Куранкоў.
Назіральнікі Валанцёрскай службы ПЦ “Вясна” паведамляюць, што па справе супрацоўнік міліцыі сведчыць, што дакладна сказаць не можа, але група, якая займалася зборам подпісаў у падземным пераходзе на станцыі метро “Каменная Горка”, складалася з трох-чатырох чалавек. А.Куранкоў паведаміў, што Эдуард Пальчыс займаўся зборам подпісам з 18.00 да 20.00, але суддзя звярнула ўвагу на нестыкоўку па часе: ў рапарце з 13.00 да 20.00, а цяпер кажа пра іншы час. На што сведка адказаў, што ў рапарце пазначана неправільна.
Да матэрыялаў справы далучаны фотаздымкі, скрыншоты відэазапісаў, пратакол, рапарт, пастанова аб прызнанні відэазапісаў рэчдокамі. У зале суда праглядзелі відэазапісы, на якіх відаць, што два чалавекі з тэчкамі проста стаяць пад паказальнікам на Каменнай горцы. Часам да іх падыходзіць людзі. На ўсіх відэа толькі два чалавекі збіраюць подпісы, хоць супрацоўнік міліцыі сведчыў наконт трох-чатырох чалавек. Суддзя запытала ў сведкі, што казаў Эдуард Пальчыс, але ён не памятае.
Пры апытанні па тэлефоне Эдуард Пальчыс пацвердзіў, што збіраў подпісы.
Суд прызнаў яго вінаватым па ч.3 арт. 23.34 КаАП Рэспублікі Беларусь і аштрафаваў на 30 базавых велічыняў (735 рублёў).
Нагадаем, 13 сакавіка адбыўся судовы разгляд над Эдуардам Пальчысам. Суддзя Фрунзенскага раёна А. Скуратовіч адправіла справу на дапрацоўку, бо не ўгледзела ў дзеяннях Эдуарда Пальчыса склад адміністрацыйнага правапарушэння.
Такім чынам, агульная сума штрафаў за зборы подпісаў у падтрымку беларускай мовы па стане на 4 красавіка складае 320 базавых велічыняў, альбо 3 264 еўра.
