Прызначана дата разгляду касацыйнай скаргі па справе Мікалая Чарнавуса

Індывідуальны прадпрымальнік Мікалай Чарнавус атрымаў ліст з суда Баранавіцкага раёна і г. Баранавічы за подпісам старшыні суда Мікалая Кміты і суддзі суда Я.А. Брэгана. У лісце паведамляецца, што гарадскі суд накіроўвае ў Брэсцкі абласны суд скаргу Мікалая Чарнавуса на пастанову ад 21 ліпеня па яго справе аб адміністрацыйным правапарушэнні па арт. 23.34 ч.3 КаАП РБ. Разгляд справы адбудзецца 27 жніўня а 11-ай гадзіне ў памяшканні Брэсцкага абласнога суда па адрасу: г. Брэст, вул. Савецкіх памежнікаў, д.41.

Суддзя Яўген Брэган прызнаўМікалая Чарнавуса вінаватым ў арганізацыі 1 ліпеня несанкцыянаванага сходу прадпрымальнікаў Баранавіцкага кааператыўнага рынку і прыцягнуў яго да адміністрацыйнага штрафу ў памеры 4,5 млн. рублёў.

– З трох сведкаў, пазначаных ў адміністрацыйным пратаколе,ніхто так і не пацвердзіў у Баранавіцкім судзе, што менавіта я быў арганізатарам несанкцыянаванага мерапрыемства 1 ліпеня. Таму я буду прасіць Брэсцкі абласны суд адмяніць вытворчасць па маёй адміністрацыйнай справе і спыніць гэтую справу з-за адсутнасцю доказаў вінаватасці, – паведаміў грамадскі актывіст.