Алесь Бяляцкі: Некалі на гэтым доме будуць шыльды Генадзю Бураўкіну і “Вясне”

2014 2014-05-30T13:06:51+0300 2014-05-30T13:15:05+0300 be http://spring96.org/files/images/sources/buraukin.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Генадзь Бураўкін.

Генадзь Бураўкін.

Раніцай 30 траўня гэты свет пакінуў  выдатны беларускі паэт Генадзь Бураўкін. Ва ўзросце 77 гадоў ён памёр у сваёй кватэры.

Доўгі час кватэра Генадзя Мікалаевіча Бураўкіна размяшчалася над  офісам Праваабарончага цэнтру “Вясна”, канфіскаванага па рашэнню судовых органаў у лістападзе 2012 года ў межах крымінальнага пераследу кіраўніка арганізацыі, праваабаронцы і літаратара Алеся Бяляцкага.

На працягу 12 год Генадзь Бураўкін нярэдка, па-суседству, наведваў “вясноўцаў”, перадаваў праз іх свае кнігі гасцям “Вясны”, цікавіўся праваабарончымі выданнямі. Неяк нават публічна прызнаўся, што жыве над “Вясной”. Ад’язджаючы надоўга на лецішча, прасіў забіраць з паштовае скрыні карэспандэнцыю і захоўваць да ягонага вяртання.

Пад час масавых ператрусаў пасля прэзідэнцкіх выбараў у 2010 годзе, калі разам са многімі грамадскімі і палітычнымі арганізацыямі “трэслі” “Вясну”, прапаноўваў пераседзець навалу ў сваёй кватэры.

Генадзя Бураўкіна моцна ўзрушыла затрыманне і суд над старшынёй Праваабарончага цэнтру “Вясна” Алесем Бяляцкім. Ён шчыра цікавіўся тым, як праходзіць судовы працэс, суперажываў з калегамі і сябрамі праваабаронцы. У мінулым годзе, пад час прэзентацыі кнігі праваабаронцы і пісьменніка Алеся Бяляцкага “Асьвечаныя беларушчынай”, Генадзь Бураўкін падзяліўся з удзельнікамі імпрэзы сваім бачаннем асобы Алеся Бяляцкага, яго праваабарончай і літаратурнай дзейнасці.

Алесь Бяляцкі, у сваю чаргу, дзяліўся сваімі марамі пра будучае і казаў: “Некалі на гэтым доме будуць усталяваныя шыльды, прысвечаныя Генадзю Бураўкіну і “Вясне”.

Сябры Праваабарончага цэнтру “Вясна” смуткуюць з нагоды заўчаснай смерці добрага, шматгадовага суседа Генадзя Мікалаевіча Бураўкіна і выказваюць спачуванне ягоным родным і блізкім.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international