Дзесяцёра грамадзянаў ЗША будуць прыцягнутыя да адміністратыўнай адказнасьці за парушэньне правілаў знаходжаньня ў Беларусі

2007 2007-02-13T10:00:00+0200 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

9 лютага ў адным з пратэстанцкіх малітоўных дамоў супрацоўнікі міліцыі затрымалі 10 грамадзянаў ЗША. Міліцыянты высьвятлялі, чаму амерыканцы праводзілі заняткі ангельскай мовы без дазволу Міністэрства адукацыі. У аддзеле грамадзкіх сувязяў абласной міліцыі інфармацыю пацьвердзілі і ўдакладнілі, што на затрыманых амерыканскіх грамадзянаў былі складзены пратаколы паводле арт. 185 КаАП — “Парушэньне правілаў знаходжаньня замежных грамадзянаў у Рэспубліцы Беларусь”, пасьля чаго іх адпусьцілі.

Па зьвестках Радыё Свабоды, амерыканцы знаходзяцца ў Магілёве каля месяца па запрашэньню дабрачыннага аб’яднаньня “Стэфан” дзеля бясплатных семінар-практыкумаў вывучэньня ангельскай мовы. Пастар аднаго з малітоўных дамоў гораду даў памяшканьне для заняткаў.

“Пастар гэтай царквы, калі быў у Амэрыцы, жыў з намі — і мы сталі для яго сям’ёй. Мы добрыя сябры, і ён дазволіў выкарыстоўваць гэты будынак бясплатна. Мы атрымалі нашы візы ад арганізацыі, якая займалася гэтымі пытаньнямі, — і яны сказалі, што мы можам тут выкладаць ангельскую мову”, - паведаміла адна амерыканская настаўніца.

Ва ўправе адукацыі Магілёўскага аблвыканкаму зазначылі, што амерыканскія грамадзяне ня мелі права выкладаць — у іх не было дазволу. Хаця супрацоўніца ўправы адукацыі пацьвердзіла, што па дазвол яны зьвярталіся, аднак ім было рэкамэндавана зьвярнуцца ў Міністэрства адукацыі, бо пытаньне знаходзіцца ў кампетэнцыі гэтага органу дзяржаўнага кіраваньня.

Паводле кіраўніка дабрачыннага аб’яднаньня “Стэфан” Дзьмітрыя Канцавенкі, нагодай для гэткага абыходжаньня з замежнымі грамадзянамі сталася нібыта іхная рэлігійная дзейнасьць у Магілёве.

Калі на амерыканцаў накладуць адміністратыўнае пакараньне, Дзьмітры Канцавенка зьбіраецца яго абскарджваць, а таксама будзе дамагацца, каб спынілі ўсе адміністратыўныя дзеяньні датычна ягоных гасьцей. Паводле Адміністратыўнага кодэксу РБ, амерыканскім грамадзянам пагражае папярэджаньне альбо штраф да дваццаці мінімальных велічыняў.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international