Праваабарончая праграма “Людзьмі звацца!” на Радыё Рацыя
Кожны аўторак у 15:05 ў эфіры незалежнай радыёстанцыі “Радыё Рацыя” - праграма “Людзьмі звацца!”, якая асвятляе падзеі, датычныя правоў чалавека на Беларусі. Праграма складаецца з рубрык “Хроніка пераследу”, "Падзея тыдня", “Асоба. Дзяржава. Грамадства” ды “Праваабарончы каляндар”.
Апошні сёлетні выпуск прысвечаны падвядзенню вынікаў году ў галіне правоў чалавека. Нажаль, асаблівасці 2011-га наўпрост звязаныя са значнымі пагаршэннямі ў сацыяльна-эканамічным і грамадска-палітычным жыцці краіны.
Аднак у пачатку – найбольш значныя падзеі і факты ў галіне правоў чалавека за мінулы тыдзень, прадстаўленыя ў “Хроніцы пераследу”.
Цягам 2011-га году не раз даводзілася назіраць, як наступствы масштабных вераломных падзеяў клаліся непамерным цяжарам на плечы канкрэтных людзей. Пра чарговае выпрабаванне лёсу, якое выпала на долю праваабаронцы Алеся Бяляцкага, – у “Падзеі тыдня”.
Уцэлым праваабаронцы краіны называюць адыходзячы год найскладанейшым у сваёй працы і жудасным – у звязку з падзеямі, якія разгортваліся ў Беларусі. Тым не менш, прадстаўнікі праваабарончых арганізацый не губляюць надзеі, што наступны год будзе больш спакойным і плённым. Сваімі спадзяваннямі праваабаронцы дзеляцца са слухачамі ў рубрыцы “Асоба. Дзяржава. Грамадства”.
У “Праваабарончым календары” – гісторыя каляндарнага летапісання, а таксама пра часы, калі пад забаронай было не толькі святкаванне галоўных зімовых святаў, Калядаў і Новага году, але і сімвала гэтых святаў – ялінкі.
Кампазіцыі гуртоў “Босае Сонца”, “Новае Неба”, “Вялікае Княства”, “Палац” і Аляксандра Памідорава ствараюць адпаведны музычны фон праграмы, набліжаючы зіму, якая ніяк не настане ў прыродзе, і дапамагаючы адчуць розныя адценні каляднага настрою.
