Міжнародная праваабарончая арганізацыя "Amnesty International" прызнала вязьнем сумленьня маладзёвага актывіста Мікіту Сасіма
Яшчэ напярэдадні вынясеньня рашэньня судом горада Баранавічы і Баранавіцкага раёна па крымінальнай справе Мікіты Сасіма, "Amnesty International" заяўляла, што калі моладзевы актывіст будзе асуджаны, то яго прызнаюць вязьнем сумленьня.
Мікіта Сасім быў затрыманы ў Менску 14 сакавіка. Яму інкрымінавалася парушэньне арт. 435 КК РБ - ухіленьне ад прызыву на вайсковую службу. 12 траўня ён быў асуджаны да трох месяцаў арышту. Паколькі да суда ён два месяцы знаходзіўся ў сьледчым ізалятары ў Баранавічах, то ў зняволеньні яму заставалася правесьці яшчэ адзін месяц.
"Amnesty International " заявіла, што Мікіта Сасім быў затрыманы "выключна за мірнае выкарыстаньне права на свабоду выказваньня, асацыяцыі і сходу".
На пачатку траўня "Amnesty International " прызнала вязьнямі сумленьня арыштаваных апазыцыйных лідэраў Аляксандра Бухвостава, Вінцука Вячорку, Дзмітрыя Дашкевіча, Сяргея Калякіна і Аляксандра Мілінкевіча. Раней арганізацыя прызнавала вязьнямі сумленьня Аляксандра Васільева, Валерыя Леванеўскага, Андрэя Клімава, Мікалая Статкевіча, Паўла Севярынца, Міхаіла Марыніча, Юрыя Бандажэўскага і іншых беларускіх палітыкаў, паведаміла Радыё Свабода.
