Арыштаванаму за флэшмоб Яўгену Контушу адмовілі ў перадачы лекаў на Акрэсціна

Удзельнік акцыі пратэсту супраць рашэння Дэпартаменту выканання пакаранняў  МУС пра закрыццё адзінай бальніцы для зьняволеных, нацыянал-бальшавік Яўген Контуш быў змешчаны ў спецпрыёмнік ГУУС Мінгарвыканкама на Акрэсціна ў цяжкім стане з высокай тэмпературай. Суд прысудзіў лідэра беларускіх нацболаў да 12 сутак арышту. Пры сабе Яўген Контуш меў бальнічны ліст з дыягназам "ангіна", а ў гэты дзень збіраўся на прыём да ўрача.
Пад час прыёму перадач раніцай 2 красавіка дзяжурныя супрацоўнікі спецпрыёмніка адмовіліся прыняць ад нацболаў лекі, у тым ліку антыбіётыкі, выпісаныя лекарам Яўгену. Матывавалася гэтая адмова адсутнасцю ўрача. Пра гэта паведамляе сайт Беларускіх нацыянал-бальшавікоў.

Нагадаем, 1 красавіка ў Менску затрымалі 10 удзельнікаў акцыі пратэсту супраць закрыцця рэспубліканскага шпіталю Дэпартаменту выканання пакаранняў Міністэрства ўнутраных справаў. Актывісты нацыянал-бальшавіцкага руху зладзілі флэшмоб.

На падыходзе да будынку дэпартаменту іх затрымалі супрацоўнікі праваахоўных органаў у цывільным. Дзесяцярых удзельнікаў флэшмобу пасадзілі ў аўтобус і павезлі ў невядомым кірунку.

2 красавіка ў судзе Ленінскага раёна Мінска былі разгледжаныя адміністратыўныя справы затрыманых ўдзельнікаў флэш-мобу: Яўген Контуш асуджаны на 12 сутак, Ігар Сідаровіч –  на10 сутак, Яўген Амелькаў — на 7 сутак. Штрафы (па 15 базавых велічыняў) атрымалі Аляксей Шкундзіч і Зміцер Сіняк.  Справы непаўнагадовых Уладзіслава Лобава і Паўла Дрыўня, якіх адпусцілі з РУУСа з бацькамі, будуць разглядацца Камісіяй па справах непаўнагадовых па месцы жыхарства.