Барысаў. ТВК шэсць разоў засядала таемна
На працягу перадвыбарчай кампаніі Барысаўская тэрытарыяльная выбарчая камісія толькі адзін раз запрасіла на сваё паседжанне незалежных назіральнікаў. Яшчэ пра шэсць паседжанняў назіральнікаў у вядомасць не ставілі.
У Барысаўскай ТВК зарэгістраваны два незалежных назіральнікі: Марына Статкевіч і Алег Мацкевіч. Яны запрашаліся на паседжанне раённай камісіі адзіны раз на працягу ўсёй перадвыбарчай кампаніі, калі абвяшчаліся вынікі праверкі збору подпісаў за патэнцыйных кандыдатаў у прэзідэнты. Якія пытанні вырашаліся камісіяй на астатніх шасці паседжаннях, застаецца таямніцай для назіральнікаў.
Сёння Алег Мацкевіч пабываў у Барысаўскай ТВК, каб даведацца, ці змогуць назіральнікі прысутнічаць падчас перадачы пратаколаў і бюлетэняў з участковых камісій у тэрытарыяльную. Сябры ТВК далі сваю згоду. Далі яны згоду і на прысутнасць назіральнікаў на паседжанні, якое пройдзе ў панядзелак, 20 снежня, і на якім будуць агучаны вынікі галасавання па пратаколах з участкаў.
Таксама назіральнік атрымаў згоду прысутнічаць на заўтрашняй сустрэчы сяброў Барысаўскай ТВК з кіраўніком місіі назіральнікаў ад СНД, выканаўчым сакратаром Садружнасці Сяргеем Лебедзевым, які павінен прыбыць у Барысаў у суботу, 18 снежня.
"Праваабаронцы за свабодныя выбары"
