Брагінская газета выканала інструкцыю – змясціла «правільныя» адказы на пытанні

Незалежныя СМІ, у прыватнасці, сайт «Беларускі партызан», размясцілі інфармацыю пра тое, што галоўнае ўпраўленне ідэалагічнай работы Гомельскага аблвыканкама даслала ў рэдакцыі дзяржаўных газет ліст з прапановай правесці апытанне жыхароў вобласці на тэму прэзідэнцкіх выбараў. У згаданым лісце ўпраўлення ідэалогіі былі не толькі прапанаваныя для апытання пытанні, але і падрыхтаваныя ідэалагічна правільныя адказы на іх.

Напрыклад, на пытанне «Ці адчуваеце вы, што ў краіне пачалася выбарчая кампанія?» у якасці варыянта быў падрыхтаваны «адказ» вуснамі невядомых рэспандэнтаў: «Не, пакуль нічога не бачу, думаў, кандыдаты будуць актыўней. Кандыдаты працуюць слаба – амаль нідзе не відаць ні плакатаў, ні ўлётак». Яшчэ пра альтэрнатыўных кандыдатаў рэспандэнты па загаду ідэалогіі мусілі былі сказаць, што «яны ўсе на адзін твар, і там няма нічога разумнага і цікавага, ніхто з іх не ведае, як кіраваць краінай, усе гаварылі дрэнна і няўпэўнена, былі не падрыхтаваныя, як быццам людзі з вуліцы. Вечар сапсаваны, лепш бы паказалі добры фільм».

Можна сумнявацца ў рэальнасці дадзенага ліста з загадамі, як праводзіць апытанні і якія адказы пісаць, а можна прагледзець мясцовую прэсу і зрабіць высновы самастойна – быў такі ліст, ці не было.

Напрыклад, брагінская раённая газета «Маяк Палесся» чамусьці запыталася ў рэспандэнта менавіта тое, што прапанавалі пытацца і ідэолагі: «Ці адчуваеце вы набліжэнне выбараў?».

Галоўны захавальнік фондаў Брагінскага гістарычнага музея з карціннай галерэяй Надзея Мялешка адказала правільна, як таго і патрабавалася ідэалогіяй, як кажуць – проста ў кропку трапіла! «У цяперашні час сачу за выступленнямі кандыдатаў у прэзідэнты, але пакуль, на жаль, ні адно з іх жывой цікавасці не выклікала. Складваецца ўражанне, што гэта цалкам непадрыхтаваныя і нявопытныя людзі, якія не маюць дакладных уяўленняў аб далейшым шляху развіцця краіны. Многае зводзіцца толькі да крытыкі дзеянняў цяперашняга кіраўніка дзяржавы і абяцанням ўсё змяніць, хоць незразумела, што збіраюцца «будаваць» самі».

Дадаткова рэспандэнт адзначыла, што «прыемна, што годную адзнаку арганізацыйнаму працэсу выбарчай кампаніі далі прадстаўнікі АБСЕ, якія пабылі на Брагіншчыне ў якасці назіральнікаў». Не ведаем, што яна мела на ўвазе пад «годнай адзнакай», але ведаем, што назіральнікі АБСЕ звычайна не даюць ніякіх ацэнак да заканчэння выбарчага працэсу.

“Праваабаронцы за свабодныя выбары”