Магілёў: Праваабаронца просіць дапусціць яго на трэнінг для сябраў участковых выбаркамаў

Праваабаронца Барыс Бухель звярнуўся ў Кастрычніцкаю раённую выбарчую камісію г.Магілёва з заявай, у якой просіць дапусціць яго прысутнічаць падчас трэнінгу для сябраў участковых выбарчых камісій Кастрычніцкага раёна г.Магілёва.

Барыс Бухель адзначае, што Цэнтральнай выбарчай камісіяй па выбарах і правядзенні рэспубліканскіх рэферэндумаў прынята Пастанова №99 ад 05.11.2010 г., у якой зацверджаны прыкладны сцэнар трэнінгу для сябраў участковых камісій.

“Ва ўводнай частцы гэтай Пастановы пазначана, што яно прынята “з улікам прапановаў Місіі назіральнікаў БДІПЧ АБСЕ” і “у мэтах забеспячэння дэмакратычнасці выбарчага працэса, празрыстасці працэдуры падліку галасоў выбаршчыкаў, узвышэння прафесіяналізму ўчастковых камісій”, - гаворыць Барыс Бухель. - Акрамя гэтага пазначаны тэрміны, паводле якіх да 8 снежня 2010 года неабходна правесці гэтыя трэнінгі. У дакуменце прадугледжана права назіральнікаў і прадстаўнікоў СМІ прысутнічаць падчас правядзення трэнінга. Зыходзячы з гэтага, я і выказаў сваё жаданне прысутнічаць на трэнінгу”.

“Праваабаронцы за свабодныя выбары”