Віцебск: Міліцыя праводзіць праверку па факце падробкі падпісных лістоў ініцыятыўнай групай Правальскага
Экс-прэтэндэнт на ўдзел у прэзідэнцкіх выбарах-2010 У.Правальскі
Выбарчая камісія Першамайскага раёна Віцебска, куды былі здадзены больш за 100 тысяч подпісаў, накіравала падпісныя лісты на крыміналістычную экспертызу. Спецыялісты пацвердзілі, што гэта – ксеракопіі. І цяпер, паводле распараджэння пракуратуры, Першамайскі РАУС праводзіць праверку фактаў падробкі.
Паводле афіцыйных звестак з камісіі, нават пры вонкавым аглядзе, падпісныя аркушы не выглядалі як арыгінальныя. І эксперты з абласной управы МУС выявілі, што насамрэч частка лістоў выраблена пры дапамозе памнажальнай тэхнікі.
На падставе такіх вынікаў выбарчая камісія звярнулася ў Першамайскую раённую пракуратуру. Пракуратура ініцыявала праверку, якую праводзіць Першамайскі РАУС.
Усе подпісы, сабраныя за вылучэнне У. Правальскага, у Віцебску прызнаныя несапраўднымі.
Уладзімір Правальскі ніяк не каментуе тое, што адбываецца. Кажа, што мусіць азнаёміцца з дакументамі, паводле якіх яго вінавацяць у падробцы. І чакае пісьмовай пастановы ЦВК: калі будзе афіцыйна заяўлена, што яго не зарэгістравалі кандыдатам на прэзідэнцкую пасаду, ён будзе звяртацца ў суд.
“Праваабаронцы за свабодныя выбары”
