Віцебск: Інфармацыя аб выбарчых падзеях – пасля аб’яваў і некралогаў

Віцебская гарадская газета “Віцьбічы” надрукавала пайменны склад раённых і абласной выбарчых камісій на перадапошняй, 7-й старонцы.  Першыя старонкі занятыя матэрыламі пра іншыя падзеі.

Самае пачэснае месца ў апошнім нумары “Віцьбічаў” займае рэпартаж пра абласныя “Дажынкі”. Ён размешчаны на першай старонцы. А вось тое, што недзе ў канцы надрукаваны склад выбарчых камісій, чытач можа і не заўважыць. Бо мала хто здагадаецца шукаць звесткі, датычныя агульнадзяржаўнай кампаніі, якая мае вызначыць далейшы лёс краіны, пасля прыватных аб’яваў, некралогаў і рэкламы вокнаў ПВХ.

Іншыя дзяржаўныя газеты Віцебшчыны – абласныя “Віцебскі рабочы” і “Народнае слова” – прапанавалі знаёмства са складам выбарчых камісій на другой старонцы. Гэта ўжо традыцыйная практыка: як правіла, менавіта  там размяшчаюць  інфармацыю пра выбарчыя падзеі.

Дарэчы, ніводная з дзяржаўных віцебскіх газет не надрукавала звестак пра тое, кім і дзе працуюць члены камісій: пазначана толькі тое, якім шляхам гэтыя людзі вылучаліся. Між тым, жыхарам Віцебшчыны было б цікава даведацца, што, да прыкладу, Дзмітрый Хома, вылучаны ў абласную выбарчую камісію ад грамадскага аб’яднання БРСМ, -- не звычайны шараговец, а першы сакратар абласной арганізацыі гэтага моладзевага саюзу. А шляхам збору подпісаў вылучаныя Вячаслаў Крукоўскі і Аляксандар Сідарэнка – адпаведна  кіраўнік адміністрацыі Чыгуначнага раёну і начальнік аддзела па справах моладзі Віцебскага гарвыканкама.

“Праваабаронцы за свабодныя выбары”