Чарговыя папярэджанні за «незаконную журналісцкую дзейнасць»

2009 2009-07-15T11:13:04+0300 1970-01-01T03:00:00+0300 be http://spring96.org/files/images/sources/pressing.jpg

Папярэджанні за «незаконную журналісцкую дзейнасць» вынесла 14 ліпеня пракуратура Мінскай вобласці двум грамадзянам Беларусі, сябрам БАЖ Аксане і Аляксандру Калінкіным. Нагода для папярэджання — іх супрацоўніцтва з расійскім «Телеканалом благих новостей» (ТБН).

 

«З 2007 года ў г. Мінску і Мінскай вобласці без акрэдытацыі ў Міністэрстве замежных спраў РБ ажыццяўляюць незаконную журналісцкую дзейнасць журналісты расійскага мас-медыя «Телеканал благих новостей», — гаворыцца ў папярэджанні. — Для незаконнай журналісцкай дзейнасці выкарыстоўваецца рэдакцыйна-прадзюсэрская ўстанова „ТРК Ангел-ТВ“…, не ўключаная ў Дзяржаўны рэестр сродкаў масавай інфармацыі».

 

Паводле дакумента, гэта выявіла праведзеная абласной пракуратурай праверка.

 

Пракуратура пералічвае, якія рэпартажы згаданых журналістаў дэманстраваліся ў эфіры ТБН: святкаванне каталіцкай Пасхі, некалькі духоўна-асветніцкіх акцый, прэзентацыя інфармацыйна-адукацыйнага рэлігійнага цэнтра ў Мінску і г.д.

 

«Такім чынам, сваімі дзеяннямі Вы парушаеце ч. 4 арт.35 Закона „Аб СМІ“, паводле якога ажыццяўленне прафесійнай дзейнасці журналістаў замежных СМІ на тэрыторыі РБ без акрэдытацыі забараняецца», — сцвярджае пракурор Мінскай вобласці Аляксандр Архіпаў, які падпісаў абодва папярэджанні.

 

Між тым, намеснік старшыні БАЖ, юрыст Андрэй Бастунец лічыць, што санкцыя ўжытая да журналістаў беспадстаўна.

 

«Пракуратура спасылаецца на арт. 35 закона „Аб СМІ“, але пры гэтым не звяртае ўвагі на арт. 1 гэтага ж закона, дзе даецца вызначэнне - хто ж лічыцца журналістам замежных СМІ. А гэта асобы, якія знаходзяцца ў працоўных стасунках, лічацца ў штаце замежнага СМІ. Рыхтаваць аўдыё- і відэаматэрыялы альбо артыкулы для замежных СМІ заканадаўства не забараняе. Больш за тое — арт. 19 Міжнароднага пакту аб грамадзянскіх і палітычных правах наўпрост гарантуе кожнаму гэтае права», — падкрэслівае А. Бастунец.

 

Па інфармацыі БАЖ, Аксана і Аляксандр Калінкіны збіраюцца абскарджваць вынесеныя ім папярэджанні.

 

Нагадаем, што на пачатку 2009 года пракуратура Гомельскай вобласці таксама вынесла папярэджанні Алегу Ражкову і Таццяне Бублікавай за «за ажыццяўленне журналісцкай дзейнасці на карысць польскага спадарожнікавага тэлеканала «Белсат».

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international