Барысаў: Заўтра судом будзе разглядацца справа Сяргея Салаша
Заўтра, 10 верасня, у Барысаўскім раённым судзе будзе разглядацца справа аб абвінавачванні незарэгістраванага кандыдата ў дэпутаты Палаты прадстаўнікоў па Барысаўскай сельскай акрузе №63 Сяргея Салаша ў здзяйсненні правапарушэння, прадугледжанага артыкулам 9.2 КаАП РБ.
Намеснік старшыні Барысаўскага райвыканкама Валянціна Шутко і бібліятэкар сярэдняй школы №11 Таццяна Стасава (у дадзены момант сакратар акруговай камісіі па выбарчай акрузе №62) вінавацяць аднаго з самых вядомых дэмакратычных актывістаў горада, лідэра абласной арганізацыі партыі БНФ у тым, што ён абразіў іх (абедзвюх адразу!), назваўшы "фальсіфікатарамі выбараў". Інцыдэнт, па меркаванні “абражаных”, адбыўся падчас кампаніі па зборы подпісаў за вылучэнне кандыдатамі ў дэпутаты парламента, 4 жніўня, у 15.30, у прыёмнай старшыні Барысаўскага савета дэпутатаў Васіля Баранніка.
Як стала вядома, абвінавачванне гатовыя падтрымаць некалькі супрацоўнікоў райвыканкама, у прыватнасці, галоўны спецыяліст аддзела адукацыі Барысаўскага райвыканкама В. Малеін і спецыяліст упраўлення па працы, занятасці і сацыяльнай абароне Барысаўскага райвыканкама О. Данская.
Сяргей Салаш лічыць абвінавачванне абсурдным. Заўтра ён мае намер замаўляць у судзе аб выкліку ў суд у якасці сведак кіраўніка яго ініцыятыўнай групы юрыста Алега Мацкевіча, лідэра руху "За волю" Аляксандра Мілінкевіча і фотакарэспандэнта газеты "Наша Ніва" Арцёма Ляву. Усе яны суправаджалі яго падчас наведвання 4 жніўня Барысаўскага райвыканкама для таго, каб заверыць подпісы, сабраныя сябрам яго ініцыятыўнай групы Аляксандрам Мілінкевічам, за вылучэнне Салаша кандыдатам у дэпутаты па Барысаўскай сельскай акрузе №63.
Сяргей Салаш разглядае ўзбуджэнне справы аб паклёпе як адзін са спосабаў палітычнага ціску, прадпрынятага для таго, каб ліквідаваць непажаданага прэтэндэнта на дэпутацкі мандат. Невыпадкова, па яго меркаванні, ён атрымаў выклік у РУУС да следчага, у апошні дзень рэгістрацыі дакументаў - 18 жніўня.
Судовае паседжанне павінна быць адкрытым і правесці яго запланавана ў кабінеце №302 у 16.00.
"Праваабаронцы за вольныя выбары"
