Крычаў: Дэмакратычныя актывісты маглі ўзарваць бомбу ў Менску з-за асабістай крыўды?

2008 2008-07-30T14:10:54+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Такую думку выказаў, са словаў начальніка УГРО Крычаўскага РАЎС спадара Чупрына, намесьнік старшыні Крычаўскага райвыканкаму спадар Сяргей Марозаў падчас размовы з незалежным прэтэндэнтам у кандыдаты ў дэпутаты спадаром Гердзеем.

 

На думку С. Марозава спадары Няроўны, Гердзей і Кудраўцаў маглі пакрыўдзіцца з нагоды таго, што ў жніўні мінулага года яны падавалі заяўку на правядзеньне пікета ў падтрымку Аляксандра Казуліна, але ўлада ім адмовіла, і яны маглі затаіць у сябе злобу і ўзарваць бомбу ў Менску 3 ліпеня. 

З гэтай нагоды незалежны прэтэндэнт у кандыдаты ў дэпутаты Сяргей Няроўны быў выкліканы на размову ў Крычаўскі РАЎС. Размову праводзіў оперупаўнаважаны УГРО Крычаўскага РАЎС Зьміцер Сідарэнка ў прысутнасьці маладога чалавека ў цывільным, які быў прадстаўлены спадаром Сідарэнка як курсант МУС.

 “Задаваўся шэраг пытаньняў з гэтай нагоды: дзе быў 3 ліпеня, ці ёсьць алібі (сьведкі, што быў у Крычаве), як дазнаўся пра выбух і што думаю з гэтай нагоды, - гаворыць Сяргей Няроўны, - На наступны дзень супрацоўнік міліцыі прыходзіў да маіх суседзяў і пытаўся, ці скандалю я, ці выпіваю, якія ў мяне ўзаемаадносіны з жонкай і г.д”.

Па падобнаму сцэнару разгортваліся падзеі і зь іншым прэтэндэнтам у кандыдаты ў дэпутаты Мікалаем Гердзеем. Зь ім размову вёў начальнік УГРО Крычаўскага РАЎС Станіслаў Чупрын. Пытаньні былі таксама прысьвечаны выбуху, плюс ці служыў у войску, ці ведае падрыўную справу і г.д. Супрацоўнік міліцыі таксама наведаў і суседзяў спадара Гердзея, якім задаваў такія ж самыя пытаньні, што і суседзям спадара Няроўнага.

“Да мяне таксама прыходзіў супрацоўнік міліцыі Зьміцер Сідарэнка, - гаворыць грамадзкі актывіст Уладзімер Кудраўцаў, - Ён узяў у мяне тлумачэньне з нагоды выбуху, а таксама запытаў мяне ці маю я зброю.”

“Міліцыя заявілася да мяне і астатніх дэмакратычных актывістаў, - гаворыць Сяргей Няроўны, - літэральна на другі дзень пасьля таго, як я падаў заяву ў акруговую выбарчую камісію аб рэгістрацыі маёй ініцыятыўнай групы. Мы лічым, што гэта псіхалягічны ціск на нас і нашыя семьі і ўжо з гэтай нагоды напісалі заяву ў Пракуратуру Крычаўскага раёна”.

Дэмакратычныя актывісты адзначаюць, што вэрсыя з тым, што яны маглі пакрыўдзіцца на ўладу за тое, што ім адмовілі ў правядзеньні пікета год назад, не вытрымлівае крытыкі.

 

“Праваабаронцы за свабодныя выбары” 

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international